مه‌سعوود ئوزێلى كاروانێ خوه‌ یێ فوتبۆلێ بدووماهى ئینا

ستێرا به‌رێ یا هه‌لبژارتییێ ئه‌لمانیا مه‌سعوود ئوزێلى بدووماهى ئینانا كاروانێ خوه‌ یێ فوتبۆلێ دژییێ 34 سالییێدا راگه‌هاند.

ئوزێلى ل سه‌ر ئه‌كاونتێن خوه‌ یێن تورێن جڤاكى راگه‌هاند، ئه‌و یێ سه‌ربلنده‌ كو بۆ ماوێ 17 سالان یاریكه‌ره‌كێ پیشه‌كار بوو، لێ ل ڤێ دووماهییێ تووشى گه‌له‌ك هنگاڤتنان بوو، و ده‌م هات شانوویا مه‌زنا فوتبۆلێ بهێلیت.

زێده‌تر گوت : ئه‌و سوپاسییا وان یانه‌یان دكه‌ت یێن یارى بوو كرى، شالكه‌، ڤێرده‌ر برێمه‌ن، ریال مه‌درید، ئارسنال، فه‌نه‌رباخچه‌ و باشاكشهیر، هه‌روه‌سا سوپاسییا هه‌موو هه‌ڤال و راهێنه‌رێن خوه‌ و جه‌ماوه‌رێ هه‌رده‌م پشته‌ڤانییا وى كرى، دكه‌ت.

ئوزێلى سوپاسییا ئه‌ندامێن خێزانا خوه‌ و هه‌ڤالێن خوه‌ یێن نێزیك ژى كر، و دیاركر، ئه‌و دێ د هنده‌ك ده‌ماندا ب رێكا ئه‌كاونتێن خوه‌ دگه‌ل جه‌ماوه‌رى ئاخڤیت.