وەزارەتا سامانێن سروشتی: ئەم دەستبەرداری مافێن دەستووری یێن هەرێما کوردستانێ نابین

د ڕاگەهاندنەکێ دا وەزارەتا سامانێن سروشتی ڕاگەهاندیە، د ئەڤان چەند مەهێن دوماهیێدا حکومەتا هەرێما کوردستانێ، د گوتوبێژ و دانوستاندنێن بەردەوام یێن دگەل حکومەتا فیدڕال دا و دوماهی جار ل سەر پرسا بودجە و نەفت و گازێ، هەردوو لا گەهشتینە ڕێککەفتنا دەستپێکی و لێکتێگەهشتنا باش، کو د چواچڤێ دەستووریدا، ماف و شایستەیێن دەستووری یێن هەرێما کوردستانێ دێ هێنە دابین کرن.

ئاماژە کریە ژی، سەرۆکێ حکومەتا هەرێما کوردستانێ ژی، د پەیوەندییێن بەردەوامدایە دگەل سەرۆکوەزیرێن فیدڕال، د دوماهی سەرەدانا سەرۆکوەزیرێن فیدڕال ژی دا بۆ هەرێما کوردستانێ، دوپاتی ل سەر چارەسەرکرنا ئاریشەیان ل سەر بنەمایێ دەستووری کریە.

گۆتیە ژی، بڕیارا دادگەها فەڕەنسی د بەرژەوەندیا حکومەتا عیراقێ دا ل دژی تورکیا، ڕێگر نابیت بۆ پەیوەندییێن مە دگەل حکومەتا بەغدا.

دیارکریە، د ئەڤی چوارچووڤەیدا، دێ سەرەدانا بەغدا کەن بۆ گوتوبێژکرن و چارەسەرکرنا بابەتێن پەیوەندیدار.

ئاشکرا کریە ژی، د ئەڤی چوارچوڤەیدا سەرەڕای کو حکومەتا هەرێمێ دوپاتیێ ل نە گۆهۆریا هەلویستێ خۆ بۆ دەستبەردارنەبوون ژ مافێن دەستووری یێن گەلێ کوردستانێ، دێ بەردەوام بیت د پەیوەندییێن دگەل بەغدا تا گەهشتن ب چارەسەرییا بنەرەت و یاسایی و دەستووری.