ئێكه‌تییا ئورۆپا دێ وه‌رگرتنا ڤیزا شینگن كه‌ته‌ دیجیتالى

ڤیزا شینگن كو به‌هرا پترا وه‌لاتێن ئێكه‌تییا ئورۆپا بخۆڤه‌دگریت، دێ بیته‌ دیجیتالى و ئه‌ڤ پێنگاڤه‌ دێ پرۆسه‌یا وه‌رگرتنا ڤیزا شینگن بله‌زتر و ب ساناهیتر لێكه‌ت و رێگرییێ ل سه‌خته‌كارییێ كه‌ت.

بالیۆزێن وه‌لاتێن ئێكه‌تییا ئورۆپا ل برۆكسلا پایته‌ختێ به‌لجیكا ره‌زامه‌ندى ل سه‌ر ده‌ستپێشخه‌رییا جڤاتا ئێكه‌تییێ بۆ دیجیتالكرنا داخوازییێن ڤیزا شینگن دا.

ل دووڤ ده‌ستپێشخه‌رییێ، داخوازكرنا ڤیزا شینگن دێ بیته‌ ئونلاین، و شێوازێ ڤیزێ دێ ژ كاغه‌زێ بۆ ڤیزا دیجیتالى هێته‌ گوهۆرین.

مارییا مالمه‌ر وه‌زیرا سوید بۆ كاروبارێن كۆچبه‌ران دبێژیت، ب دیجیتالكرنا ڤیزا شینگن، داخوازكرنا وێ ڤیزێ بۆ گه‌شتیارێن قانوونى دێ ب ساناهیتر بیت، و د هه‌مان ده‌مدا دێ ئاسایشا ده‌ڤه‌را شینگن ژى زێده‌تر لێهێت.