نڤیسەرەکێ قەزا ئاکرێ دەست ب پرۆژێ کۆمکرن و دروستکرنا بەرھەمەکێ تایبەت ل سەر دیرۆکا ھونەرێ ئاکرێ ژ سالێن دەستپێکێ تا سالا ٢٠٢٠ێ دروست دکەت و نھا ل قۆناغا دەستپێکێ دایە.
نڤیسەر کاوە زھێر، ل دۆر ئەنسکلۆپیدیا ھونەرێ ئاکرێ بۆ خانی نیوز راگەھاند، پرۆژێ ئەنسکلۆپیدیا ھونەرێ ئاکرێ دەستپێکریە و نھا یێ د قۆناغا کۆمکرنا دیرۆکا ھونەرێ ئاکرێ دا ل سالێن دەستپێکی تا سالا ٢٠٢٠ و وی ل بەرە پرتووکەکێ ل ژێر ناڤێ ئەنسکلوپیدیا ھونەرێ ئاکرێ دروست بکەت.
گۆت ژی : بابەتێن وی ھەلبژارتین شانۆ، دراما، سینەما، شێوەکاری، موزیک، سترانبێژێن دەستپێکی لاڤژەبێژ، سترانبێژێن سەردەمێ نوو، باشنڤیسی، ھونەرێ ڤەشارتی، ھونەرێ دەفێ ل تەکیایێ، زڕنابێژ و دەھۆل قوتێن ئاکرێ، فۆتوگرافەر، کامیرەڤان، پێگوتنێن تەریقەتێن ئۆلی ب خوەڤە دگریت.
کاوە زھێر ئاشکرا کر، گاڤێن مەزن د ڤی واری دا ھاڤێتینە و گەلەک زانیاری ل دۆر دیرۆکا ھونەرێ ئاکرێ گەھشتینە وی و ھەموو دیکومێنت کرینە، پتریا وان زانیارییان ژی ڤەشارتینە و خەلک وان کەسان نانیاسیت ژ بەرکو بۆ دیرۆکەکا کەڤن ڤەدگەریت.
نڤیسەر کاوە زھێر خودانێ دو کلیپێن ھەلبەستێ ھەنە بناڤێ ، دایکا نێرگزێ و دادێ و بەرھەمەکێ ھەلبەستێ وەکو دیوانا ھەلبەستان بناڤێ (مرن) چاپ بوویە و ھاتیە بەلاڤ کرن، د چەندین شانۆگەری و فلمێن سینەمایێ و درامایێن تێلەڤزیۆنی و ناڤخویی وەک ئەکتەر تێدا پشکدار بوویە.
خانی نیوز، رەمەزان ھەرنی
