مه‌سرور بارزانى ب هه‌لكه‌فتا جه‌ژنا سه‌رێ سالا بابلیان په‌یامه‌كا پیرۆزباهیێ به‌لاڤكر

سه‌رۆكێ حكومه‌تا هه‌رێما كوردستانێ ب هه‌لكه‌فتا هاتنا جه‌ژنا سه‌رێ سالا بابلیان(ئه‌كیتۆ) په‌یامه‌كا پیرۆزباهیێ ئاراسته‌ى كلدانى و ئاشوورى و سریانیان ل كوردستان و عیراقێ كر.
مه‌سرور بارزانى سه‌رۆكێ حكومه‌تا هه‌رێما كوردستانێ ، په‌یامه‌كا پیرۆزباهیێ راگه‌هاند و ئاماژه‌ كر: ب هه‌لكه‌فتا جه‌ژنا ئه‌كیتۆ و سه‌رێ سالا بابلیان، گه‌رمترین پیرۆزباهیان ئاراسته‌ى ملله‌تێ كلدانى و ئاشوورى و سریانیان ل كوردستان و عیراقێ دكه‌م. هیڤیدارم سالا نوى، سالا ئاشتى و ئارامی و كه‌یفخوشی و دوماهى ئینانا هه‌مى نه‌خۆشیان بیت.
د پشكه‌كا دى یا په‌یاما سه‌رۆكێ حكومه‌تێ دا هاتیه‌، ئێك ژ سیمایێن گه‌شێن هه‌رێما كوردستانێ، پێكڤه‌ژیانا ئاشتیانه‌یه‌ دناڤبه‌را هه‌مى پێكهاتێن ئاینى و نه‌ته‌وه‌ی یێن جودادا. و خوازت ئه‌ڤ پێكڤه‌ژیانا‌ هه‌ى زێده‌تربیت و هه‌مى پێكڤه‌ بۆ زێده‌تر پێشخئێستنا كوردستانێ كار بكه‌ن.