رێباز حه‌ملان : مه‌ترسییا به‌لاڤكرنا مووچه‌ى نه‌ما

هاریكارێ سه‌رۆكوه‌زیرێن هه‌رێما كوردستانێ بۆ كاروبارێن دارایى راگه‌هاند، پشتى رێككه‌ڤتنا هنارده‌كرنا په‌ترۆلا هه‌رێما كوردستانێ دناڤبه‌را هه‌ولێر و به‌غدا دا هاتییه‌ ئیمزاكرن، مه‌ترسییا به‌لاڤكرنا مووچه‌یێ فه‌رمانبه‌رێن هه‌رێما كوردستانێ نه‌ما، و ل ده‌مه‌كێ نێزیك دێ ده‌ست ب به‌لاڤكرنا مووچه‌یێ هه‌یڤا ئادارێ هێته‌كرن.

رێباز حه‌ملان هاریكارێ دارایى یێ سه‌رۆكوه‌زیرێن هه‌رێما كوردستانێ دیاركر، مووچه‌یێ سه‌رباز و هێزێن ئێمناهییێ و خانه‌نشینان و مووچه‌یێ هه‌موو خه‌لكێ كوردستانێ كو زێده‌تر ژ ئێك ملیۆن و 250 هزار كه‌سان مووچه‌ى ل كوردستانێ وه‌ردگرن، ژ داهاتێ په‌ترۆلێ مووچه‌ى وه‌ردگرن، و هه‌ر كه‌سێ كه‌یفا وى ب هندێ بهێت كو په‌ترۆلا هه‌رێمێ نه‌مینیت، زه‌ره‌رمه‌ندێ ئێكێ دێ  مووچه‌خۆر و خه‌لكێ كوردستانێ بن، لێ خۆشبه‌ختانه‌ ب بزاڤێن مه‌زن یێن سه‌رۆك بارزانى و سه‌رۆكێ هه‌رێما كوردستانێ و سه‌رۆكێ حكومه‌تێ، كو ل چه‌ند رۆژێن بوورى بزاڤێن به‌رده‌وام دگه‌ل سه‌رۆكوه‌زیرێن عیراقێ دكر، كو جهێ سوپاسییێ یه‌ سه‌رۆكوه‌زیرێن عیراقێ ب تێگه‌هشتن هاته‌ دناڤ ڤى بابه‌تیدا و هه‌موو ئه‌و تیمێن پشكدارى كرى و جێگرێ سه‌رۆكوه‌زیرێن عیراقێ د. فوئاد و تیما هه‌رێما كوردستانێ رۆله‌كێ گرنگ گێرا و پێكڤه‌ ب ئێك تیم شیان ڤێ تێگه‌هشتن و رێككه‌ڤتنێ بكه‌ن.

هه‌روه‌سا رێباز حه‌ملانى ئاشكراكر، بێ گۆمان كارێ سه‌ره‌كى یێ حكومه‌تا هه‌رێما كوردستانێ ژ وى داهاتێ په‌ترۆلێ، دابینكرنا مووچه‌ی یه‌، پشكه‌ك ژ پاره‌یێ په‌ترۆلێ یێ به‌رهه‌ڤه‌ و پشكا دیژى دێ ئه‌ڤرۆ به‌رهه‌ڤ بیت، و دگه‌ل ڤه‌گه‌ریانا مه‌سرور بارزانى سه‌رۆكێ حكومه‌تێ و وه‌زیرێ دارایى ژ به‌غدا، دێ لیسته‌یا مووچه‌ى دانن و ده‌ست ب به‌لاڤكرنا مووچه‌یێ هه‌یڤا ئادارێ كه‌ن.

و دووپاتكر، ئه‌و خه‌لكێ هه‌رێما كوردستانێ پشتراست دكه‌ت هه‌موو بزاڤێن حكومه‌تا هه‌رێما كوردستانێ بۆ هندێ بوون كو چ مه‌ترسى نه‌كه‌ڤیته‌ سه‌ر مووچه‌یێ مووچه‌خۆرێن هه‌رێما كوردستانێ، و خه‌لكى پشتراست دكه‌ت كو چ مه‌ترسى نه‌ما، هه‌موو دێ مووچه‌یێ خوه‌ وه‌رگرن و گوزه‌رانى و ژیانا خه‌لكى ژ ئه‌ڤرۆ وێڤه‌ دێ باشتر لێهێت، و ئه‌و پیرۆزباهییێ ل هه‌موو گه‌لێ عیراق و گه‌لێ كوردستانێ دكه‌ت، جاره‌كا دى ده‌ستكه‌ڤته‌كێ مه‌زن بده‌ست كوردستانێڤه‌ هات و ل نێزیكترین ده‌م دێ ده‌ست ب به‌لاڤكرنا مووچه‌ى هێته‌كرن.