د. نەوزاد هێتۆتی: د ڤێ قووناغێ دا عێراقێ دڤێت‌ ل سەر ئاستێ ھەرێمی و دەرڤە ژی ئاریشان چارەسەر بكـەت

ئاژانسا خانی ، زنار  تۆڤی:

د. نەوزاد هێتۆتی، مامۆستایێ زانستێن سیاسی ل زانکۆیا سەلاحەدین ل هەولێرێ، بۆ ئاژانسا خانی دیار کر: ئەو رێككەفتنا هاتییە کرن یا دەمکییە بۆ ھنارتنا نەفتا ھەرێمێ، بەلێ ئەم دشێین بێژین کو رێككەفتنەکا گەلەک گرنگە ئەگەر كار ل سەر بهێتە کرن بۆ هندێ رێككەفتنەکا درێژخایەن ل گەل بەغدا بهێتە کرن، بەغدا ژی ژبەر كۆمەکا ھۆكاران پێدڤی ب وێ رێككەفتنێ ھەبوو، سوودانی ژی د راگەهاندنێن خۆ دا بەحسێ هندەک ژ وان خالان کرییە و دبێژیت: راوەستاندنا نەفتێ ب تنێ زیانێ ناگەهینیتە ھەرێمێ، بەلكو دێ زیانێن مەزن گەهینیتە عیراقێ ژی، ب ھەمان ئاراستە ھەرێمێ ژی گەلەک پێدڤی ب وێ رێككەفتنێ ھەبوویە، لەوما خالێن ئاشکرا یێن وێ رێککەفتنێ ئەڤەنە، ژ وان ژی دروست نەکرنا ئاریشان بۆ پەسەند كرنا بودجەیی، كو ب دیتنا چارچۆڤێ ھەماھەنگییێ زۆر گرنگە و دێ دەستێ وان ڤەکەت بۆ هندێ بەرنامێن خۆ بجھ بینن، هەروەسا رێکگرتن ل بلندبوونا ( کورتهێنانێ) د بودجەیێ عێراقێ دا، چونكی ئەگەر ئەو رێككەفتنە نەهاتبا كرن، دا رێژا کورتهێنانێ د بودجەیی دا گەلەک بیت و دا زیانێن مەزن گەهنە بودجەیێ عێراقێ، رێكنەکەفتن ل گەل ھەرێمێ ب تنێ زیان بۆ ھەرێمێ نەدبوون، بەلكو دا زیانێن مەزن گەهنە كەرتێ ئابووری و هەموو داھاتێ عێراقێ ژی، دیسان سوودانی د راگەهاندنێن خۆ دا بەحسێ ڤێ خالێ دکەت، کو د ڤێ قووناغێ دا بەغدا پێدڤی ب هندێ ھەیە، کو پەیوەندی یێن باش ل گەل ھەرێمێ ھەبن.

ناڤهاتی گۆت ژی: خالێن ڤەشارتی یێن وێ رێككەفتنێ ل گەل ھەرێمێ ئەڤەنە، رێكنەكەفتن ل گەل ھەرێمێ دا چارەنڤیسێ حكومەتا سوودانی ئێخیتە هەمبەر ئایندەکێ نەدیار، چونكی ئەگەرەکێ زۆر ھەبوو پارتی خۆ ژ حكومەتێ ڤەکێشیت و ئەڤە دابیتە دەستپێکەک بۆ ب دووماهی ھاتنا حكومەتا سوودانی، ب تایبەتی ژ ئالییێ جادا شيعی دلگرانییەک ژ سوودانی هەیە و سوننی ژی وەكو پێدڤی ژ حكومەتا سوودانی د رازی نینن، حكومەتا چارچۆڤێ ھەماھەنگییێ گەلەکا لاوازە دناڤا جادا شيعی دا و گەلەک پێدڤی ب وێ رێككەفتنێ ھەبوو، داكو خۆ ب ھێز بكەن، ب تایبەتی ئەوان ب پشتەڤانییا ئیرانێ بەرنامەکێ باش لبەر دەست هەیە بۆ هندێ سیناریۆیا ھەلبژارتنێن 2021 ێ، دوبارە نەبن.

د. نەوزاد هێشتا دبێژیت: د ڤێ قووناغێ دا بەغدا چ ل سەر ئاستێ ھەرێمێ چ ل سەر ئاستێ دەرڤە ب وی ئاراستەیی سیاسەتێ دکەت، كو ئاریشان چارەسەر بكەت، بۆ هندێ پتر كار بكەن ل سەر ب ھێز كرنا پێگەهێ خۆ و نەھێلانا مەترسییان، بەلێ ئەڤە ب واتایا چارەسەرییا ئاریشان نینە، هەروەسا ترس ژ فشارێن ئەمریكا، ب تنێ سەبارەت پرسا رەوانەكرنا دۆلاری بۆ عێراقێ، ئەمریكا چاڤەرێ هندێ دکەت، كو سوودانی پێنگاڤێن جددی بھاڤێژیت بۆ رێگریکرنێ ل برنا دۆلاری بۆ ئیرانێ، لەوما راگرتنا نەفتا ھەرێمێ دبیت كارڤەدانێن پتر ھەبان ژ ئالییێ ئەمریكاڤە، ئیران كو ھەڤپەیمانییا سەرەكی یا شیعانە نەڤێت د ڤێ قووناغێ دا چ ئاریشە بۆ حكومەتا سوودانی دروست ببن، چونكی ئیران ل ژێر فشاران دایە ل سەر ئاستێ ناڤخۆیی و ژ دەرڤە، لەوما گەلەک یا گرنگە ھەڤپەیمانێن وێ ب ھێز بن،

ئەو چەند ژی گۆت: سەرەرایی ناكوكی یێن ناڤخۆیی، بەلێ بھێزییا پێگەهێ ھەرێمێ وەكرییە، کو سوودانی وێ رێككەفتنێ بكەت، چونكی ب دیتنا ئەوان ھێشتا ئەو دەم نەھاتییە بشێن پتر ژ ڤان فشاران ل سەر ھەرێمێ دروست بكەن، دیسان راگرتنا ھنارتنا نەفتێ وەكرییە، کو فشارێن زۆر ل سەر حكومەتا سوودانی دروست ببن، بۆ هندێ بودجەیی بۆ ھەرێمێ بهنێریت، ب تایبەتی دبیت ئەڤە خالەکا گرنگ بیت بۆ هندێ ئەمریكا پتر فشاران سەر بەغدا دروست بكەت، هەروەسا كاركرن بۆ لاواز كرنا نەیارێن چارچۆڤێ ھەماھەنگییێ ل ناڤا حكومەتێ و ل دەرڤەیی حكومەتێ.