مالپەرێ مەعلومە یا ئیراقی ل سەر زارێ سەرۆکێ دەستەیا وەبەرھێنانا ھەرێمێ بەلاڤکرییە، د سالا ٢٠٢٠ێ دا ھەرێم ب قەبارێ دوو ملیار و ٥٠٠ ملیۆن دۆلاران وەبەرھێنان د کەرتێن جودا جودا دا کرییە، و دیارترین ئەو کەرتە ژی کەرتێن ئاکنجیبوونێ و ساخلەمیێ و سەنتەرێن بازرگانی بوون.
ئەڤرۆ ئێکشەمبی ١-١٠-٢٠٢١ راگەھاندنەک ل سەر زارێ محەممەد شوکری، سەرۆکێ دەستەیا وەبەرھێنانێ ل ھەرێمێ بەلاڤکرییە، ل سالا ٢٠٢٠ێ و د سەر بەلاڤبوونا ڤایرۆسێ کۆرۆنایێ و کەرەنتینەکرنێ کو کاریگەری کربوو سەر ھاتنا وەبەرھێنەرێن بیانی، وان ٩٣ێ موولەتێن وەبەرھێنانێ دابوونە وەبەرھێنەران.
ئەو چەندە ژی دیار کر ھژمارەکا پرۆژەیان ب کوژمێ ١٢ ملیار دۆلاران د قوناغێن دانوستاندنێ دانە کو ئەو ژی تایبەتن ب پرۆژەیێن کەرتێن پێشەسازی و چاندن و ئاکنجیبوونێ. ب جھئینانا ڤان پرۆژەیان ژی دێ بنە ئەگەرەکێ مەزن بۆ گەشەکرنا ئابوورێ ھەرێمێ و کێمکرنا رێژا بێ کارێ.
