ل دووڤ راگه‌هاندنا سه‌رۆكایه‌تییا هه‌رێما كوردستانێ، دكۆمبوونێدا ره‌وشا عیراقێ ب گشتى و پێكهاته‌یێن ل هه‌رێما كوردستانێ و عیراقێ ب تایبه‌تى مه‌سیحیان و ده‌ڤه‌رێ هاته گوتوبێژكرن، تیشك خسته سه‌ر بزاڤێن مانا مه‌سیحییان ل عیراق و هه‌رێما كوردستانێ.
سه‌رۆكوه‌زیرێن ڤاتیكانێ په‌سنه و پێزانین بۆ رۆلێ نێچیرڤان بارزانى و بزاڤێن وى ژ پێخه‌مه‌ت كۆمكرنا لایه‌نان و چاره‌سه‌ركرنا ئاریشه‌یان ل عیراق و هه‌رێما كوردستانێ ده‌ربرین، و هه‌موو پشته‌ڤانییا ڤاتیكانێ بۆ هه‌رێما كوردستانێ دووپاتكر.
وه‌كو د راگه‌هاندنا سه‌رۆكایه‌تییا هه‌رێما كوردستانێدا هاتى، كادرینال پیترۆ پارۆلینى ده‌ستخۆشى بۆ ڤه‌كرنا زانكۆیا كاسۆلیكى ل هه‌رێما كوردستانێ و هاریكارى و پشته‌ڤانییا حكومه‌تا هه‌رێما كوردستانێ بۆ زانكۆیێ و به‌رفره‌هكرنا وێ كر، هه‌روه‌سا سه‌ره‌دانا خوه یا پار سال بۆ هه‌ولێرێ ب سه‌ركه‌ڤتییانه و ره‌وشا پێكڤه‌ژیانا ل هه‌رێما كوردستانێ ب دلخۆشكه‌ر ل قه‌له‌م دان.
ژلایێ خۆڤه نێچیرڤان بارزانى دووپاتكر، هه‌رێما كوردستانێ خوازیارا هندێ یه مه‌سیحى ل نیشتمانێ خوه بمینن، هه‌موو ئاماده‌یى و ئاسانكارییێن هه‌رێما كوردستانێ ژى بۆ ئه‌وێن حه‌زدكه‌ن ڤه‌گه‌رن ده‌ربرین، هه‌روه‌سا داخواز كر ڤاتیكان ل ئێكه‌تییا ئورۆپا پشته‌ڤانییا هندێ بكه‌ت كو پرۆژه‌یێن ئاڤه‌دانكرنێ بۆ ده‌ڤه‌رێن مه‌سیحییان ل هه‌رێما كوردستانێ و عیراقێ بهێنه بجهئینان.
په‌یوه‌ندییێن هه‌ولێر – به‌غدا، دانوستاندنێن چاره‌سه‌ركرنا ئاریشه‌یێن دناڤبه‌را واندا و ده‌ڤه‌رێ ب گشتى، ته‌وه‌ره‌كێ دییێ كۆمبوونێ بوو.
