نێچیرڤان بارزانى دووپاتییێ ل بله‌زتركرنا پێنگاڤێن ئێكخستنا هێزێن پێشمه‌رگه‌ى دكه‌ت

ب سه‌رپه‌رشتییا نێچیرڤان بارزانى سه‌رۆكێ هه‌رێما كوردستانێ كۆمبوونه‌كا به‌رفره‌هـ دناڤبه‌را شانده‌كێ بلند یێ هێزێن هه‌ڤپه‌یمانان ب سه‌رۆكایه‌تییا جه‌نه‌رال ماتیۆ مكفارلن فه‌رمانده‌یێ هه‌ڤپشكێ هێزێن هه‌ڤپه‌یمانان ل عیراق و سووریا و وه‌زاره‌تا پێشمه‌رگه‌ى و ده‌زگه‌هێن دى یێن په‌یوه‌ندیدارێن هه‌رێما كوردستانێدا ب رێڤه‌چوو.

دكۆمبوونێدا كو كونسۆلێ گشتییێ ئه‌مریكا ل هه‌رێما كوردستانێ تێدا یێ ئاماده‌بوو، دانوستاندن ده‌رباره‌ى رێكخستن و چاكسازییێن هێزێن پێشمه‌رگه‌ى هاته‌كرن، و هه‌لسه‌نگاندن بۆ قووناغێن بجهئینانا ئه‌وان پلانان هاته‌ كرن، یێن كو ژ چارچووڤه‌یێ رێككه‌ڤتنا دناڤبه‌را وه‌زاره‌تا پێشمه‌رگه‌ى و وه‌زاره‌تا به‌ره‌ڤانییا ئه‌مریكا دا هاتینه‌ دانان.

ژلایێ خۆڤه‌ سه‌رۆك نێچیرڤان بارزانى هاریكارییێن به‌رده‌وامێن هه‌ڤپه‌یمانان بۆ پێشمه‌رگه‌ى د قووناغ و بوارێن جوودا دا بلند نرخاندن و دووپاتى ل بله‌زتركرنا پێنگاڤێن ئێكخستنا پێشمه‌رگه‌ى و لادانا ئاسته‌نگێن به‌رده‌م پرۆسه‌یێ كر، و ئاماده‌ییا خوه‌ بۆ هه‌ر هاریكارى و پشته‌ڤانییه‌كێ دڤى بیاڤیدا نیشاندا.

جه‌نه‌رال ماكفارلن به‌رده‌وامییا پشته‌ڤانى و هاریكارییێن هه‌ڤپه‌یمانان بۆ پێشمه‌رگه‌ى دبوارێن جوودا دا و بجهئینانا پێنگاڤێن رێكخستنا پێشمه‌رگه‌ى ژ چارچووڤێ وه‌زاره‌تا پێشمه‌رگه‌ى ب شێوه‌یه‌كى كو هه‌رێما كوردستانێ ببیته‌ خۆدان هێزه‌كا نیشتیمانییا ئێكگرتى، دووپاتكر.