د. عه‌بدولفه‌تاح عه‌بدولرزاق: دو زانکۆیێن نوو دێ هێنه‌ ڤه‌كرن

ئاژانسا خانی:

 

بریکارێ وەزارەتا خواندنا بلند دیار كر: سەرۆکێ حکومەتا هه‌رێما كوردستانێ رەزامەندی نیشان دایە بۆ ڤه‌کرنا دو زانکۆیێن نوو” كو ئێك ل قه‌زا ئاکرێیه‌ و ئێك ژی ل گەرمیان، بەلێ ھێشتا ب فەرمی به‌رسڤا سەرۆکاتییا حکومەتا هه‌رێمێ نەگەهشتییە وان و پێشتر جڤاتا وەزیران ڤه‌کرنا ھەردو زانکۆیان پەسەند کرییە.

د. عەبدولفەتاح عەبدولرزاق، زێده‌تر بۆ ئاژانسا خانی گۆت: به‌ری ساله‌كێ دو پڕۆپۆزەل هاتینه‌ پێشکێش كرن بۆ وەزارەتا خواندنا بلند و ڤه‌كۆلینێن زانستی بۆ ڤه‌کرنا ھەردو زانکۆیێن پۆلیتەکنیکا ئاکرێ و گەرمیان، د هه‌مان ده‌مدا لژنا پسپۆر ژ لایێ وەزارەتا وان ڤه‌ رەوانەیی وان جهان هاتییه‌ كرن‌ و پێداچوون بۆ ڤه‌کرنا ھەردو زانکۆیان هاتییه‌ کرن، لدووڤ دا ژ لایێ جڤاتا وەزیران ڤه‌کرنا زانکۆیەکێ ل ئاکرێ و زانکۆیەکێ ل گەرمیان هاتینه‌ پەسەند کرن و رەوانەیی سەرۆکاتییا جڤاتا وەزیران هاتینه‌ کرن.

ناڤهاتی دیار كر ژی: هه‌كه‌ د ده‌مه‌كێ نێزیك دا رازیبوون ل سه‌ر ڤه‌کرنا ھەردو زانکۆیان بگەهیتە وان، دێ بۆ سالا نوو یا خواندنێ ( 2023_2024) ێ”  ھەردو زانکۆیێن ئاکرێ و گەرمیان هێنه‌ ڤه‌كرن و دێ قوتابییان وەرگرن، نوكه‌ قوتابی ل هه‌ردو جهان دهێنه‌ وەرگرتن، بەلێ هه‌ردو زانكۆ سەر ب زانکۆیێن دی ڤەنه‌ و نه‌ زانکۆیێن سەربەخۆ نه‌”.

عه‌بدولفه‌تاحی گۆت ژی: هه‌تا نوكه‌ ب فەرمی ژلایێ سەرۆکاتییا جڤاتا وەزیرانڤە به‌رسڤا خواندنا بلند نه‌هاتییه‌ دان، به‌لێ سەرۆکی حکومەتا هه‌رێمێ، رەزامەندی لەسەر ڤه‌کرنا ھەردو زانکۆیان دایه‌.