ئەمریکا گرۆپێ حووسییێن یەمەنێ ئێخستە د ناڤا لیستا تیرۆرێ دا. مایک پۆمپیۆ، وەزیرێ دەرڤە یێ ئەمریکا راگەھاند، ئەڤ پێنگاڤا وان ب ئارمانجا لێپرسین و سزادانا حووسییانە ژ ئەگەرێ ھێرشێن وان ژ دەرڤەی سنۆری کو خەلکێ مەدەنی دکەنە ئارمانج.
دیار ژی کر، ژبلی ناساندنا حووسییان وەک رێکخستنەکا تیرۆرستی، وان ھەر سێ سەرکردەیێن مەزن عەبدولمەلک حووسی، عەبدولخالق بەدەرین حووسی و عەبدولا یەحیا حەکیم ئێخستینە د ناڤا لیستا تیرۆرستێن نیڤ دەولەتی دا.
حووسی گرۆپەکێ شیعە مەزھەب یێ یەمەنێ نە و کۆمارا ئیسلامی یا ئیرانێ ھاریکارییا ماددی و مەعنەوی و لۆجستی یا وان دکەت. ل دەستپێکا شەرێ ناڤخۆ یێ یەمەنێ ل سالا ٢٠١١، حووسییان پشتەڤانییا خوە بۆ ئۆپۆزسیۆنێ راگەھاند و ل ھەیڤا ئەیلولا سالا ٢٠١٤ێ وان کودەتا ب سەر حکومەتا نوی یا وەلاتێ خوە دا کر و دەست ب سەر باژێرێ سەنعا یێ پایتەخت و بەشەکێ مەزن یێ دەڤەرێن وەلاتی دا گرت.
