سه‌رۆكێ حكومه‌تا هه‌رێما كوردستانێ هه‌ژماره‌كا بریاران ژبو رێكخستنا سیسته‌مێ كۆمكرنا باجێ و رسوماتان ده‌ركرن.
نڤیساره‌كا حكومه‌تا هه‌رێما كوردستانێ كو ئیمزایا مه‌سروور بارزانى ل سه‌ره تێدا دیاركریه، ژبو رێكخستنا سیسته‌مێ كۆمكرنا باج و رسوماتان و په‌یره‌وكرنا دادپه‌روه‌رى و ل به‌رچاڤوه‌رگرتنا به‌رژه‌وه‌ندیا گشتى، هه‌ژماره‌كا بریاران ل سه‌ر راسپارده‌یا وه‌زاره‌تا دارایى و ئابورى هاتینه دان.
ل گۆره‌ى نڤیسارێ، وه‌زاره‌تێن ڤه‌گوهاستن و گه‌هاندن و وه‌زاره‌تا دارایى و ئابوورى هاتن راسپاردن بۆ دانانا بنه‌مایان بۆ كومپانیێن ئه‌نته‌رنێتێ بۆ دانا باجێ ب رێژا 20% ژ فروتیێن وان.
هه‌روه‌سا دانانا بنه‌مایان بۆ كومپانیێن په‌یوه‌ندیكرنێ بۆ دانا باجێ به‌رامبه‌ر خزمه‌تگوزاریێن وان ل هه‌رێما كوردستانێ.
هه‌ر ل گور نڤیسارێ، لیژنا یاسایى یا جڤاتا وه‌زیران بو كارێ پێدڤى و راستڤه‌كرنا په‌یره‌وێ لێبرینا راسته‌وخۆ بو باجا ده‌رامه‌تى لسه‌ر كارمه‌ندێن كه‌رتێ تایبه‌ت هات راسپاردن.
هه‌روه‌سا هه‌رسێ وه‌زاره‌تێن دارایى و ئابوورى و ناڤخوه و سامانێن سروشتى بۆ رێكخستنا باجێ ل سه‌ر كۆمپانیێن زێره‌ڤانیێ یێن نه‌فت و گازێ و دیاركرنا میكانیزمه‌كێ بۆ دانانا باجێ ل سه‌ر ترۆمبێلێن تایبه‌ت هاتن راسپاردن.
هه‌روه‌سا وه‌زاره‌تێن دارایى و ئابوورى و وه‌زاره‌تا بازرگانى و پیشه‌سازى بۆ دووڤچوونا پرۆژێن وه‌به‌رهێنانێ ل هه‌رێمێ یێن ل گۆر یاسایێ بریارا لێخوشبوونا باجێ هه‌ى، ب مه‌به‌ستا دیاركرنا میكانیزمه‌كێ ژبو پابه‌ندبوونا وان ب دانا هنده‌ك ژ ئه‌ركێن خوه به‌رامبه‌ر حكومه‌تێ.
هه‌ر ل گۆره‌ى نڤیسارا سه‌رۆكێ حكومه‌تێ وه‌زاره‌تێن دارایى و ئابوورى و سامانێن سروشتى بۆ دیاركرنا میكانیزمه‌كێ بو وه‌رگرتنا باجا برینا راسته‌وخۆ ژ كارمه‌ندێن بیانى یێن كومپانیایێن نه‌فتێ و رێكارێن پێدڤى به‌رامبه‌ر وان باجده‌رێن پێگیرى رێنما نه‌بن، هه‌روه‌سا ب هه‌ماهه‌نگییا وه‌زاره‌تا گه‌شت و گوزارێ باجێ ل سه‌ر ئۆتێل و مه‌یخانێن چار ستێر و سه‌ردا بسه‌پینن، د گه‌ل چه‌ندین بریارێن دى یێن بۆ دانانا ستیكه‌ڕا ل سه‌ر به‌رهه‌مێن كحولى و جگاران.
ل گۆره‌ى بریارا سه‌رۆكێ حكومه‌تێ ده‌مێ 60 رۆژان ب وان وه‌زاره‌تان وه‌كو مۆله‌ت هاتیه دان بو بجهئینانا وان كاران و فه‌رمانگه‌ها هه‌ماهه‌نگى دێ دووڤچوونێ بۆ رێنما و كارێن وه‌زاره‌تا كه‌ت.
