سەرۆکێ جڤاتا نوێنەرێن ئیراقێ، محەممەد حەلبوسی، پێشوازی ل شاندێ پارتی یا دیموکراتا کوردستانێ ب سەرۆکاتیا دکتۆر رۆژ نوری شاوێسی کر. ئەڤرۆ ١١-١-٢٠٢١ێ و ل دووڤ راگەھاندنەکا نڤێسینگەھا راگەھاندنێ یا سەرۆکێ جڤاتا نوونەران، محەممەد حەلبوسی پێشوازی ل شاندێ پارتی یا دیموکراتا کوردستانێ کریە و دانوستاندن ل سەر پێشھات و رەوشا سیاسییا وەلاتی کرن، ھەروەسا پەیوەندییا دناڤبەرا بەغدا و ھەرێمێ و ھەلبژارتنێن پێشوەخت ھاتییە گەنگەشەکرن.
ھەمان ژێدەری دیارکریە: د روونشتنا وان بەحسێ بودجا گشتی یا سالا ٢٠٢١ێ ھاتە کرن و پێدڤیاتییا چارەسەکرنا ئاریشێن ھەلاویستی و داکۆکیکرن ل سەر بەلاڤکرنا مووچەیان ب رێکێن دادپەروەرانە تەوەریێن دی یێن روونشتنا حەلبووسی و شاندێ پارتی بوویە.
نڤێسینگەھا راگەھاندنا سەرۆکێ پەرلەمانێ ئیراقێ گۆتیە ژی، ھەردوو لا ھەڤرا بوون کو دڤێت دەستور دەستھەلات بیت ل سەر ھەموویان و پێدڤیە ھەلبژارتنێن پێشوەخت ژی د سەقایەکێ ئارام دا بھێنە کرن.
