ئانۆ جەوھەر:  ئه‌م دخوازین ھەموو لایەنێن سیاسی رێزێ ل ئیرادا پێكھاتان بگرن

ئاژانسا خانی” تایبەت:

نوونەرەکێ کریستییانان ل ھەرێما کوردستانێ ئاشکرا کر، کریستییان ل گەل هندێنە سندۆقێن تایبەت ھەبن بۆ دەنگدەرێن کریستییانان و ھەر بەربژارەکێ کریستییانان یێ دەنگێ کریستییانان ب دەستڤە بینیت” دێ بیتە نوونەرێ راستەقینە یێ کریستییانان.

ئانۆ جەوھەر، وەزیرێ ڤەگوھاستنێ و نوونەرێ کریستییانان  بۆ ئاژانسا خانی دیارکر” داخوازێ ژ ھەموو لایەنێن سیاسی دکەین رێزێ ل ئیرادا پێكھاتان بگرن و ئەگەر ھندەک لایەن بێژن نوونەرێن کریستییانان یێن حەقیقی نینە” بلا ئەو کەس و لایەن ژی خۆ بەربژار بکەن ل ھەر دەڤەرەکا کریستییان تێدا ھەبن و ھەر کەسەکێ کریستییان دەنگی ددەنێ ئەو نوونەرێ راستەقینە یێ کریستییانایە ل کوردستانێ.

ئانۆ جەوھەر گۆت ژی” کۆمبوونا کریستییانان ل گەل نوونەرێ نەتەوێن ئێکگرتی و ھەموو لایەنێن دی ژی تەکەزی ل سەر هندێ کرییە ھەلبژارتن د دەمێ خوە بھێنە ئەنجامدان و ئێک بازنە ھەبیت بۆ کریستییانان، داكو بشێن نوونەرێن خوە بۆ پەرلەمانێ کوردستانێ دیار بکەن، ئەگەر سندۆقێن تایبەت ژی بۆ کریستییانان بھێنە دانان ئەم د رازینە.