ئەو خالێن د ماددێن 13-14 دا هاتینە زێدەکرن ل ناڤا هۆلا پەرلەمانی ناهێنە دەربازکرن

ئەندامەکێ جڤاتا نوونەرێن عیراقێ: “ل گۆرەی ڕێککەڤتنا دناڤبەرا حکومەتا هەرێما کوردستانێ و حکومەتا عیراقێدا، پێشبینی دکەین ئەو خالێن د ماددێن 13-14 دا کو گرێداینە ب پشکا هەرێما کوردستانێ ڤە هاتینە زێدەکرن، ل ناڤا هۆلا هۆلا پەرلەمانی ناهێنە دەربازکرن.”

خالد ڕێکانی، ئەندامێ جڤاتا نوونەرێن عیراقێ بۆ ئاژانسا خانی ڕاگەهاند،”هەمی بەرهەڤی بۆ ئەنجامدانا کۆمبوونا جڤاتا نوونەران هاتینە کرن، بتنێ دیارکرنا دەمێ کۆمبوونێ مایە و ئەم چاڤەڕێی دەستەیا سەرۆکایەتییا پەرلەمانی دکەین بۆ دەستنیشانکرنا دەمەکێ دیارکری بۆ برێڤەچوونا کۆمبوونێ.”

دەربارەی کۆمبوونا بووری یا لژنا دارایی یا پەرلەمانی کو هندەک خالێن هەڤدژی پڕۆژەیێ هەردوو حکومەتێن هەرێمێ و بەغدا ل سەر ڕێککەڤتین ژ لایێ هندەک پەرلەمانتاران ڤە هاتبوونە زێدەکرن خالد ڕێکانی گۆت:”پەیوەندییێن مە دگەل لایەنێن ئەو کارە کری ئاسایی بووینە ڤە، لێ مە ئەو ئاگەهدارکرینە کو ب چ ڕەنگان قەبیل ناکەین جارەکا دی ئەو کارە دووبارە ببیت و ئەگەر گۆهڕینەک هەبیت پێدڤیە پێش دەم بهێینە ئاگەهدارکرن.”

ناڤهاتی ئاماژەکر:”ل گۆرەی وێ ڕێککەڤتنا دناڤبەرا حکومەتا هەرێما کوردستانێ و حکومەتا فیدڕالی دا هەین، پێشبینییا مە ئەوە کو ئەو خالێن ل سەر ماددێن 13-14 کو گرێداینە ب پشکا هەرێما کوردستانێ ڤە ناهێنە دەربازکرن و ئەم وەکو فڕاکسیۆنا پارتی ژی ئامادە نابین بۆ دەنگدانا ل سەر چ ماددە و برگەیان کو هەڤدژی وێ ڕێککەڤتنا دناڤبەرا هەردوو حکومەتێن هەولێر و بەغدا.”

دەربارەی پرسیارا ئاژانسا خانی، ئەگەر هاتوو دناڤ پەرلەمانیدا دەنگ ل سەر ماددەیێن 13-14 هاتە دان دێ هەلویستێ پارتی چ بیت؟ ئەندامێ جڤاتا نوونەرێن عیراقێ د بەرسڤێ دا گۆت: ل گۆرەی ڕێککەڤتنا دناڤبەرا لایەنێن سیاسیدا بۆ پێکئینا حکومەتا محەمەد شیاع سوودانی ب چ ڕەنگان یا قەبیلکری نینە ب شێوەی دەنگ ل سەر وان ماددان بهێتە دان، لێ ئەگەر دەنگ ل سەر هاتە دان و ئەو ماددە هاتنە دەرباز کرن ل وی دەمی سەرکردایەتییا سیاسییا پارتی دیموکراتی کوردستان و فڕاکسیۆنا پارتی ل پەرلەمانێ عیراقێ دێ هەلویستێ خۆ هەبیت و تا دوماهیێ دێ بەڕەڤانییێ ژ ماف و دەستکەڤت و بەڕژەوەندییێن گەلێ کوردستانێ کەین.”