هیومن رایتس وۆچ: ژ ئه‌گه‌رێ ململانێن سیاسی شنگال نه‌هاتییه‌ ئاڤه‌دانكرن

رێکخراوا چاڤدێرییا مافێن مرۆڤی راگەهاند، پرۆسا ئاڤەدانکرنا قەزا شنگالێ ژ ئه‌گه‌رێ ململانێن سیاسی ئیفلیج بوویە، کەرتێ خواندنێ و ساخله‌می و کارەبا د ره‌وشه‌كا خرابدانه‌ و ب تنێ 96 قوتابخانێن وێ قەزایێ هاتینه‌ ڤه‌کرن.

 ئه‌ڤرۆ 6 ی خزیرانا 2023 ێ، رێکخراوا چاودێرییا مافێن مرۆڤی (هیومن رایتس وۆچ) راپۆرته‌ك ده‌ربارەیى ره‌وشا قەزا شنگالێ ل سنوورێ پارێزگه‌ها نەینەوا به‌لاڤكرییه‌ و تێدا دیار كرییه‌” كو پرۆژێ ئاڤه‌دانکرنا شنگالێ راوەستایە، هۆکار ژی بۆ ناکۆکی یێن سیاسی ل سەر برێڤەبرنا وێ قەزایێ ڤه‌گەراندینە.

وێ رێكخراوی دیار كرییه‌” محەمەد شیاع سوودانى، سەرۆک وەزیرێن عێراقێ 50 ملیار دینار تەرخانکرینە بۆ ئاڤەدانکرنا شنگالێ، به‌لی ململانا دناڤبه‌را حکومەتا فیدرالى و هەرێما کوردستانێ وه‌کرییە ئەو پارە نه‌هێته‌ خەرج كرن، د ده‌مه‌كی دا ژێرخان و خزمەتگوزاری یێن سەرەکى ل وی باژێری بووینە بەربەست ل هه‌مبه‌ر ڤه‌گەریانا پتر ژ 200 هزار ئاوارێن شنگالێ، کو 85% ێ یا کوردێن ئێزدینه‌.

 سارە سونبر، ڤه‌کۆله‌را کاروبارێن عێراقێ ل رێکخراوا هیومن رایتس وۆچ دبێژێت: “تەرخانکرنا پارەیی، گاڤه‌كا ئەرێنییە، ئەگەر ب کریاری ئه‌و پاره‌ بهێته‌ ب كارئینان بۆ خزمەتگوزارییان و ژێرخانا شنگالێ ل روویێ چاڤدێرىیا ساخله‌مییێ، کارەبێ، ئاێ، جهێن ئاكنجیبوونێ، بەلێ ناکۆکى یێن سیاسى رێگرن ل هه‌مبه‌ر ب کارئینانا ئەوان پاران.

ل سالا 2020 ێ، حکومەتا هەرێما کوردستانێ و حکومەتا فیدرالى رێککەفتنا شنگالێ ئیمزا كر بۆ ئاساییکرنا ره‌وشا وێ قه‌زایێ، بەلێ ئه‌و رێککەفتنە نه‌هاته‌ بجهئینان.