وەکی ئەڤرۆ 10ی خزیرانا 2014ێ تیرۆرستێن داعش ھێرشی باژێرێ میسل کرن و د چەند دەمژمێران دا شیان بتمامی دەستھەلاتا ھێزێن عیراقێ ل وی باژێری ب دوماھی بینن، ل وی دەمی زێدەتری 30 ھزار لەشکەرێن عیراقی دگەل ب دەھان جۆرێن چەکێ نوو و سەردەمیانە د باژێرێ میسل دا ھەبوون، د بەرامبەر دا ژمارا چەکدارێن رێکخراۆا تیرۆرستییا داعش یێن کو ھێرشی سەر باژێرێ میسل کری ب تنێ بۆ (500) چەکداران دھاتە مەزنکرن، لێ ب وێ ژمارا مەزن یا لەشکەری و چەکێن پێشکەفتی ڤە، ھێزێن عیراقی نەشیان بەرھەنگاری ژمارەکا کێم یا تیرۆرستێن داعش ببن، لەورا ھێزێن ئەمنی یێن عیراقێ نەچاری رەڤینێ بوون و باژێرێ میسل دگەل ھەمی کەلوپەلێن لەشکەری و چەکێ پێشکەفتی بۆ تیرۆرستێن داعش ھێلان.
پشتی وێ شکەستنا مەزن، ھێزێن عیراقێ جارەکا دی خۆ رێکخستن و بزاڤکرن بۆ بەرھەنگاربوونا چەکدارێن رێکخراۆا تیرۆرستی یا داعش، ھێزێن پشکداری د شەڕێ ل دژی تیرۆرستێن داعش دەستپێکری پێکھاتبوون ژ:
( فرقا 2 ب 15 هزار لەشکەران، فرقا 3 ب 15 هزار لەشکەران، پۆلیسێن فیدرالی ب 10 ھزار پۆلیسان، پۆلیسێن ناڤخۆ ب 30 ھزار پۆلیسان).
پشتی ڤێ ژمارا مەزن یا لەشکەری رێکخستن کری، بڕیار دا ب ھەمی جورێن چەکێ سڤک و گران و تانک و زریپۆشێن نوو و پێشکەفتی ژ جۆرێن، ئەبرامز و چیفتن و باشترین فڕۆکێن شەری بەرھەنگاری تیرۆرستێن داعش ببن.
د بەرامبەردا ل وی دەمی ژمارا چەکدارێن رێکخراۆا تیرۆرستی یا داعش زێدە ببوو، بۆ دناڤبەرا 500 تا 3ھزار چەکداران و چەکێن وان ژی ژ جورێن، کلاشینکوف و BKC و RPG بوون.
ل وی دەمی فەرماندێن شەڕی پێکھاتبوون ژ سەرۆک وەزیرێن عیراقێ یێ وی دەمی، نوری مالکی فەرماندێ گشتییێ ھێزێن چەکدار و ھەر ئێک ژ ھاریکارێن وی “فەریق مەھدی غەراوی, فەریق عەبوود قەنبەر, فەریق عەلی غێدان” ئەو فەرماندێن مەزن یێن عیراقێ بوون کو سەرپەرشتیا شەڕێ ل دژی تیرۆرستێن داعش دکر بۆ دووبارە ڤەگەڕاندن و پاقژکرنا میسل ژ چەکدارێن رێکخراوا تیرۆرستی یا داعش.
ھەر وەسا د بەرامبەر دا سەرپەرشت و بەرپرسێن ئێکێ یێن رێکخراوا تیرۆرستی یا داعش پێکھاتبوون ژ ھەر ئێک ژ، (ئەبوبەکر بەغدادی سەرپەرشتێ ئێکێ یێ رێکخراوا تیرۆرستی یا داعش و ھەر ئێک ژ ھاریکارێن وی، ئەبوبەکر خاتونی، عەدنان ئیسماعیل نەجم دلێمی، محەمەد یونس ئەحمەد) دھێتە زانین چەکدارێن رێکخراوا تیرۆرستی ل بن فەرمان و بڕیارێن ئەڤان سەرپەرشتێن خۆ ھێرشن تیرۆرستی بۆ سەر مروڤایەتیێ ئەنجامددان.
ل وی دەمێ چەکدارێن داعش ھێرشکریە سەر باژێرێ میسل ھەر زوی خەلکێ ئاکنجی ژ ھەردوو لایێن میسل ڤە بزاڤکرن وی باژێری بجھــ بھێلن و بەرەڤ باژێرێن ھەرێما کوردستانێ ئاوارەبوون، ژ پێخەمەت پاراستنا ژیانا خۆ و زارۆکێن خۆ چونکی ل وی دەمی قەوارێ ھەرێما کوردستانێ ب ھەمی جھــ و پارێزگەھێن خۆڤە ئارامترین جھێن عیراقێ بوون، ژ ئەنجامێ وێ ڕەڤین و ئاوارەبوونێ ب گشتی 940 ھزار کەس ئاوارەبوون کو 760 ھزار ژ وان ژ لایێ رۆژئاڤایێ باژێڕێ میسل بوون و 176 ھزارێن دی ژ لایێ رۆژھەلاتێ هەمان باژێڕ ڤە ئاوارەبوون، ل وی دەمی ب فەرمانا سەرۆک مەسعود بارزانی، خەلکێ ھەرێما کوردستانێ و ھەمی سازیێن حکومەتێ و رێکخراوێن حکومی و نە حکومی، ب گەرمی پێشوازیا ئاوارەیێن میسل و دەڤەرێن شەر لێ دروستبووین کرن و مال و مزگەفت و کەنیسە و جھێن ئایینی تا کو سازیێن حکومەتێ ژی بۆ کرنە جھێن ڤەحواندنێ و رێزەکا مەزن لێ گرتن.
وێرانکاریێن ل تاخێن باژێرێ میسل ژ لایێ چەکدارێن رێکخراوا تیرۆرستی یا داعش ڤە ھاتینە ئەنجامدان گەلەک د مەزنبوون و ل لایێ رۆژئاڤایێ میسل 15 تاخ ھاتنە وێرانکرن، ل لایێ رۆژھەلاتێ میسل ژی ڤە 16 تاخ وێرانکربوون، بگشتی 23 تاخێن دی زیان گەھشتبوونێ لێ نە وەکی وان تاخێن ب ئێکجاری ھاتینە ژناڤبرن، ھەر وەسا ژمارەکا مەزن یا ئاڤاهییان هاتنە ژناڤبرن، تیرۆرستێن داعش دەست ژ شینوار و مزگەفت و دێرێن دێرین و دیرۆکی نە پاراستن و ب ئێکجاری ژناڤبرن و وێرانکرن ژ وان جھێن دیرۆکی یێن گرنگ ژی (مزگەفتا نەبی یونس, نەبی شیت، مزگەفتا مەزن، منارا حەدبا، مۆزەخانا کەڤن یا میسل) کرنە کاڤل و ب سەر ئێک دا ئینانە خار.
ژمارا وان کەسێن د ھێرشێن تیرۆرستێن داعش دا بۆ سەر باژێرێ میسل بووینە قوربانی، بۆ نێزیکی 4 هزار کەسان ژ سڤیل و لەشکەری دھێتە مەزنکرن کو ب دەستێن تیرۆرستێن داعش ھاتنە کوشتن، ھەر وسا ژمارا برینداران ژی گەھشتبوو 38 ھزار و 366 کەسان، ژ ڤێ ژمارێ ژی بتنێ ل ھەردوو لایێن رۆژھەلات و رۆژئاڤا ژمارا بریندارا 24 ھزار و 580 کەس بووون.
