پرۆفیسۆره‌كێ كه‌نه‌دى خوه‌ فێرى زمانێ كوردى كرییه‌، چار په‌رتوك ده‌رباره‌ى كوردان نڤیسینه‌

ده‌یڤید رۆمانۆ پرۆفیسۆره‌كێ كه‌نه‌دییه‌ و ل باژێرێ سپرینگفێلد یێ ویلایه‌تا میزوور یا ئه‌مریكا دژیت، ل سالا 1996 ژ توركیا ب پایسكلێ چوو باشوورێ كوردستانێ، دووڤدا چوو رۆژهه‌لاتێ كوردستانێ، ئه‌و ب كوردى دئاخڤیت و سالانه‌ جه‌ژنا نه‌ورۆزێ ژى دگێریت.

رۆمانۆ كه‌نه‌دییه‌ و زمانێ ده‌یكا وى فره‌نسییه‌، چار په‌رتوك ل دۆر كوردان نڤیسینه‌ و ب ده‌هان ڤه‌كۆلین ده‌رباره‌ى كوردان كرینه‌، وه‌كو ئه‌و دبێژیت: سالانه‌ ل 21ى ئادارێ جه‌ژنا نه‌ورۆزێ دگێریت، هندى دژیانێدا مابیت دێ ڤه‌كۆلینان ل دۆر كوردان و كوردستانێ كه‌ت.

رۆمانۆ نوكه‌ مژوولى نڤێسینا په‌رتوكه‌كێیه‌ یا تایبه‌ته‌ ب سیاسه‌تا ده‌رڤه‌ یا حكومه‌تا هه‌رێما كوردستانێ، مامۆستایێن زانكۆیان ل ئه‌مریكا هه‌ر حه‌فت سالان جاره‌كێ بهێنڤه‌دانێ وه‌ردگرن، رۆمانۆى بریاردایه‌ بهێنڤه‌دانا خوه‌ وه‌رنه‌گریت و بچیته‌ هه‌ولێرێ و ل زانكۆیا سه‌لاحه‌د‌دین بێى به‌رامبه‌ر وانه‌یان بێژیت.