پروسێسا نووکرنا تۆمارا دەنگدەران دەست پێکرییە و بەرپرسێن ھەلبژارتنێن پارتی ل مووسلێ گازندان ژ رێکارێن کۆمسیۆنا بلندا ھەلبژارتنێن ئیراقێ دکەت کو کێشەیان بۆ دەنگدەران دروست دکەت.
مەناف حەسەن، بەرپرسێ ھەلبژارتنێن پارتی ل مووسلێ بۆ مالپەرێ فەرمیێ پارتی یا دیموکراتا کوردستان راگەھاندییە: پارتی ل مووسلێ بەرھەڤییان بۆ پشکداریکرنێ د ھەلبژارتنێن ئەڤ سالە یێن ئیراقێ دا دکەت، چونکی سەرکردایەتییا پارتی بریار دایە پشکدارییا ھەلبژارتنێن پێشوەخت ل ئیراقێ بکەت، ئەو ژی وەک حیزب ل سنۆرێ پارێزگەھا نەینەوا بەردەوام کاردکەن بۆ ھندێ داکو بۆ رۆژا ھەلبژارتنان د بەرھەڤبن.
بەرپرسێ ھەلبژارتنێن پارتی ل مووسلێ گۆت ژی: کۆمسیۆنا بلندا ھەلبژارتنێن ئیراقێ ل سنۆرێ مووسلێ ئاریشەیان بۆ دەنگدەران دروست دکەت و پێدڤییە سەرکردایەتییا کوردی بھێتە سەر خەت، چونکی ھەر دەنگدەرەکێ سەرەدانا بنگەھێن خۆ تومارکرنێ بکەت گەلەک دئینن و دبەن و داخوازا پشتگیرییا کوچ و کوچبەران ژێ دھێتە کرن، دەم ژی گەلەکێ کێمە، ھەیڤەک ژی یا کێمە بۆ وەلاتییان.
مەناف حەسەن روون کرییە ژی کو گەلەک جاران دەنگدەر دێ چنە بنگەھێن خۆتومارکرنێ، ب تایبەت ئەوێن ئاوارە ل ھەرێما کوردستانێ، دبێژنێ ئامیرێن کێم ژ بەغدا بۆ مە ھاتینە، ئەڤە ژی ھەموو ئاریشەنە بۆ دەنگدەری.
ناڤبەری دووقاتژی کرییە: رێژا پشکداریکرنا وەلاتییان وەک پێدڤی نینە، ئەڤە ژی پشکەکا دییە کو پەیوەندی ب رێکارێن کۆمسیۆنێ ڤە ھەیە.
