فەرمانگەها میدیا و زانیاری ئەڤرۆ ڕاگەهاند، شاندەكێ حکومەتا هەرێما کوردستانێ، ب سەرۆکایەتییا سەفین دزەیی، بەرپرسێ فەرمانگەها پەیوەندییێن دەرڤە، سەرەدانا ئەورۆپا كر و ب یاوەرییا نوینەرێ حکومەتا هەرێما کوردستانێ، دگەل ژان ئاسلبۆرن، وەزیرێ دەرڤە یێ لۆکسەمبۆرگ كۆمبوو.
سەفین دزەیی و وەزیرێ دەرڤە یێ لۆکسەمبۆرگ، ڕەوشا هەرێما كوردستانێ ژ ڕوویی سیاسی و ئابووری و هەلبژارتنان گۆتۆبێژكرن، دووپات ل هندێ كر، كو گرنگە کۆمەلا نیڤدەولەتی پشتەڤانییێ ل هەلبژارتنێن هەرێما کوردستانێدا بكەن و گرنگە بەری دووماهیك هاتنا ئەڤسالە هەلبژارتنێن هەرێمێ بهێنەكرن.
بەرپرسێ فەرمانگەها پەیوەندییێن دەرڤە و وەزیرێ دەرڤە یێ لۆکسەمبۆرگ، پەیوەندییێن دناڤبەرا هەرێم و عیراقێ گۆتۆبێژكرن ب تایبەت ئەو ئاریشەیێن هەین وەك پێکهاتنا حکومەت و ڕێككەڤتنا هەردوو ئالیان و یاسایا بودجە و كێماسییێن بودجەی، ئەو ئاستەنگێن دهێنە د ڕێكا هەرێما كوردستانێدا.
هەروەسا د كۆمبوونێدا، بەحس ل پەنابەر و ئاواران هاتەكرن ب تایبەتی ئێزدی و کریستییانێن دەشتا نەینەوا و ئەو وەلاتییێن شنگالێ، کو ژ ئەگەرێ پەکەکە و هندەك هێزێن میلیشیا نەشێن ڤەكەڕنە دەڤەرێن خۆ.
سەفین دزەیی، بەرپرسێ فەرمانگەها پەیوەندییێن دەرڤە دیاركر، داخواز هاتییەكرن ئێكەتییا ئەورۆپا پرسا پەتڕۆل و گاز و بودجەی پشتەڤانییا لێكتێگەهشتنا زێدەتر دناڤبەرا هەرێما کوردستان و عیراقێ بكەت، هەروەسا دووپات ل پشتەڤانییا دیموکراسی و ئازادی و ئازادییا ڕۆژنامەگەرییێ ل هەرێما کوردستانێ هاتییەكرن.
ژان ئاسلبۆرن، وەزیرێ دەرڤە یێ لۆکسەمبۆرگ، پشتەڤانییا خۆ بۆ پێشمەرگە و هەرێما کوردستانێ و هەر مەترسییەکا ل دەڤەرێ دیاركر.
