مه‌سرور بارزانى پێشوازى ل شانده‌كێ ئه‌مریكى كر

سه‌رۆكێ حكومه‌تا هه‌رێما كوردستانێ پێشوازى ل شانده‌كێ ئه‌مریكى ب سه‌رۆكایه‌تییا جێگرا هاریكارێ وه‌زیرێ به‌رگرییێ بۆ كاروبارێن رۆژهه‌لاتا ناڤین كر.

مه‌سرور بارزانى سه‌رۆكێ حكومه‌تا هه‌رێما كوردستانێ پێشوازى ل شانده‌كێ ئه‌مریكى ب سه‌رۆكایه‌تییا دانا سترۆل جێگرا هاریكارێ وه‌زیرێ به‌رگرییێ بۆ كاروبارێن رۆژهه‌لاتا ناڤین كر، د دیداره‌كێدا كو جێنێرال ماتیۆ ماكڤه‌رلین فه‌رمانده‌یێ گشتییێ هێزێن هه‌ڤپه‌یمانان ل عیراق و سوریا تێدا د پشكداربوون، جێگرا هاریكارێ وه‌زیرێ به‌رگرییێ سلاڤ و رێزێن وه‌زیرێ به‌رگرییا ئه‌مریكا ب سه‌رۆكێ حكومه‌تا هه‌رێمێ گه‌هاندن و پشته‌ڤانییا وه‌لاتێ خوه‌ بۆ هه‌رێما كوردستانێ و هێزێن پێشمه‌رگه‌ى دووپاتكر.

ته‌وه‌ره‌كێ كۆمبوونێ دانوستاندبوون ل سه‌ر پێشهاتێن تایبه‌ت ب چاكسازییا وه‌زاره‌تا پێشمه‌رگه‌ى و پێنگاڤێن رێكارێن بجهئینانا یاداشتا لێكتێگه‌هشتنێ دناڤبه‌را وه‌زاره‌تا پێشمه‌رگه‌ى و وه‌زاره‌تا به‌رگرییا ئه‌مریكا دا.

ل دۆر ڤێ چه‌ندێ جێگرا هاریكارێ وه‌زیرێ به‌رگرییا ئه‌مریكا ئاماژه‌ ب هندێ دا، ئه‌مریكا و هه‌ڤپه‌یمانییا نێڤده‌وله‌تى دێ ل سه‌ر پشته‌ڤانیكرنا هێزێن پێشمه‌رگه‌ى بۆ رووبرووبوونا گه‌فێن تیرۆرێ ب تایبه‌تى داعشێ و پشتراستبوون ژ لاوازبوونا وێ رێكخراوا تیرۆرستى د به‌رده‌وامبن.

هه‌روه‌سا سه‌رۆكێ حكومه‌تێ سوپاسى و پێزانینێن هه‌رێما كوردستانێ بۆ پشته‌ڤانییێن ئه‌مریكا ده‌ربرین، حه‌زا هه‌رێما كوردستانێ بۆ پێشڤه‌برنا په‌یوه‌ندییێن هه‌موو لایانه‌ دگه‌ل ئه‌مریكا دووپاتكر.