ئارمانج عەگید نێروەیی
بیرا من دهێت دەما کاک نێچیرڤان د هەژدەیێ هەیڤا دوانزدەیا ساڵا دوهەزار و هەڤدێ سەرەدانا فەرمی یا بەرلینێ کری کو ئەز ژی ل وێرێ بووم و راستی هێرشا چەند کەسێن بەلتەجی هاتیم بەردەریێ سەرۆکاتیا وەزێرێن ئەڵمانیا “بوندز کانسلەرئامت” کو وێ دەمی دکتور ئەنگێلا مێرکل راوێژکارا ئەڵمانیا بوو، کاک نێچیرڤان ب شاندەکێ باڵا هات و پێشوازییەکا گەرم لێهاتە کرن، کوردان ژبۆ جیهانێ شەرێ تیرورێ دکر و داوی ب داعشێ د ئینا، پاشان کۆرۆنا هات، جیهان هەموو راوەستییا، دیسان ژیان ئاسایی بوو، ئەڵمانیا دیسان دەست ب پەیوەندییێن خوە د ئاستا بلند دا کرن، شاندنا وەزیرا کاروبارێن دەرڤە، وەزیرا بەرگرییێ، چەندین گروپێن بازرگانی و وەبەرهێنەران، سازی و رێکخستنێن سڤیل، نها ژی سەرۆکێ هەرێمێ هاتە داخوازکرن بۆ هەڤدیتنا لگەل راوێژکارێ نوی و وەزیرێ بەرێ یێ ئابوریێ ئەڵمانیا ئولاف شولتس. د سەردەما راوێژکار مێرکل دا، رێزلێهاتە گرتن ژبەرکو سیاسیەکێ راستگویە، نوونەری نەتەوەیەکێ قارەمانە، سەرۆکێ هەرێمەکا فەرمییە د چوارچۆڤێ دەستورێ کۆمارا فیدراڵ یا عیراقێدا، وی نەتەوەی سەنگ و رۆلێ خوە هەنە ل ناوچەیێ و روژهەلاتا ناڤین و جیهانێ، نها ژی سەردەما راوێژکار شولتسە، دێ هەمان رێز لێ هێتە گرتن، ژبەر رۆلا وان یا گرنگیدان ب پێکڤەژیانێ، پاراستنا پەنابەران، رێخۆشکرن و کارئاسانی بۆ وەبەرهێنەرێن ئەڵمانی ل کوردستانێ، پاراستنا کوردێن ژ ئۆلا ئێزدی و ڕزگارکرنا کچ و ژنێن دەستێ داعشێ دا. کورد د رۆژا ئەڤرۆ دا زۆر گرنگن بۆ جیهانا سەردەم، پێویستی ب پەیوەندییێن زێدەتر و بهێزترن لگەل هەموو گەل و وەڵاتان.
بۆ نمونە لگەل گەلێ ئەڵمان و کۆمارا فیدراڵ یا ئەڵمانیا، ئەڵمانیا دزانیت ل ژێر و ل سەر ئاخا کوردستانێ چ هەیە بۆ ئەڤرۆ و سبەرۆژا جیهانێ، ژبەر وێ ژی یا گرنگییێ ددەتە پەیوەندیێن خوە لگەل دەستهەلاتا هەلبژارتی و فەرمی و دەستورییا هەرێما کوردستانێ، کو پێک دهێت ژ رێبەرێ گەل، سەرۆکاتیا هەرێمێ، پەرلەمان و حکومەت، هێزا پێشمەرگەیێن پارێزڤانێن ئاسایشا جیهانێ.
هەڵبەت پەیوەندییێن ڤی وەڵاتی و وەڵاتێ هەنێ هەبوون، لێ ژبەر تورکیا زور جاران ئەو پەیوەندییە ڤەشارتی بوون، هەروەسا ژبەر عیراقێ و وەڵاتێن ناوچەیێ زور جاران ئەڵمانان خوە دیر دکرن. لێ سەرەدەری و سیاسەتا راست و دروست یا کوردستانێ لگەل تورکیا و پێکهاتنا ئەربیل و بەغداد، پالپشتن بۆ گرنگیدانا ئاشکرا ژلایێ وەڵاتێن رۆژئاڤای تایبەت ئەڵمانیا، فرەنسا، بریتانیا و ئەمریکا ب دەستهەلاتا هەلبژارتی یا کوردستانێ.
ئەگەر کوردان بڤێت پەیوەندییێن وان ئێدی ب ئاشکرایی بهێزتر بکەڤن، پێویستە چەند خالان بەرچاڤ بکەن و ل سەر بچن مینا: چێکرنا گروپێن دۆستایەتیێن پەرلەمانی لگەل پەرلەمانێ کوردستانێ بۆ بهتر ئالۆگوری و پێکڤەکارکرنێ.
چێکرن و ڤەکرنا نوینەراتیان ل زۆربەیا وەڵاتان، گوهرینا هندەک نوینەراتیێن خوە ل یەکێتیا ئەوروپا و ڤەکرنا نوینەراتیان ل وەڵاتێن ماین، گرنگیدان ب رەڤەندا کوردستانی بێی جێوازیا ئولی، ئایدولوجیا سیاسی، ناوچەیی و بیروباوەرێن جودا. ئاڤاکرنا لوبیا کوردستانی دیر و گەلەک دیر ژ پارت و لایەنێن سیاسی، بەلکو تەنها نەتەوەیی و نیشتیمانی.
گرنگیدان و کارکرنا باشتر لگەل نوینەراتییێن وان وەڵاتان یێن کو ل ئەربیلێ نە.
رێکدان و ئاسانکاری کرن بۆ ڤەکرنا زێدەتر یا نوینەراتیێن وەڵاتێن جیهانی، تایبەت ئەوروپایی و ئەمریکا لاتین. راگەهاندنەکا راست و دروست ب زمانێن بیانی.
ڤەگەراندن و سود وەرگرتن ژ سەربور و شارەزاییا ڕەڤەندا کوردستانی.
دەستورێ هەرێمێ بهێتە پەسەندکرن و هەڵبژارتنێن سەرۆکاتیێ، پەرلەمان، ئەنجومەنێن پارێزگەهـ و شارەوانیان د دەم و وەختێن خوە دا بگورەی دەستوری.
سازدانا 4 چوار کوربەندێن ساڵانە یێن سەر ئاستێ جیهانێ ل چوار جهێن کوردستانێ بۆ نمونە:
1. کوربەندێ ئابوری و وەبەرهێنانێ ل دهۆکێ
- کوربەندێ زانست و پەروەردەیی ل ئەربیلێ.
3 کوربەندێ تەندروستی و خوە پاراستنێ ل سلێمانیێ - کوربەندێ پێکڤەژیان و پاراستنا ژینگەهێ ل بارزان.
هەڵبەت زور خاڵ و هزروبیر هەنە مرۆڤ ئاماژێ بدەتێ، لێ ئەڤێن ل ژۆر ب گرنگ دبینم، ب دەستپێکرنا وان دێ هزرێن مەزنتر و کارێن باشتر لێ دروست بن
