پەڕلەمانتارێن كوردستانێ دێ هێنە خانەنشینكرن

بڕیارەكا دادگەها فیدڕالی یا عیراقێ، كۆمبوونێن پەڕلەمانێ كوردستانێ ڕاگرتن و بڕیارە مامەلەیێن خانەنشینبوونێ بۆ ئەندام پەڕلەمانێن كوردستانێ بهێنە دروستكرن.

ڕۆژا 30/5/2023، دادگەها فیدڕالی یا عیراقێ ڕاگەهاند، درێژكرنا تەمەنێ پەڕلەمانێ كوردستانێ یا نەدەستووری یە. پشتی بڕیارا دادگەها فیدڕال، پەڕلەمانێ كوردستانێ سەرجەم كۆمبوونێن خۆ ڕاگرتن. ل دویڤ زانیارییان ژی، ل چەند ڕۆژێن بهێت دیوانا سەرۆكاتییا پەڕلەمانێ كوردستانێ دێ ڕێكارێن كارگێری بۆ خانەنشینبوونا پەڕلەمانتارێن كوردستانێ دەستپێكەن و ل دویڤ پلەیێن وان، پەڕلەمانتار دێ هێنە خانەنشینكرن.

ل دویڤ مەرجێن یاسایی یێن خانەنشینبوونا پەڕلەمانتاران پێدڤییە پەڕلەمانتار:

1 . ژیێ وی ژ 45 سالان كێمتر نەبیت.
2 . ژمارا سالێن خزمەتێ 15 سال هەبن.

ژبۆ وێ یەكێ كوردستان نەكەڤیتە بۆشاییا یاسایی، پەڕلەمانێ كوردستانێ د كۆمبوونا خۆ یا ڕۆژا 9/10/2022 ژیێ خۆ بۆ هەتا ڕۆژا 31/12/2023 درێژكر، ددەمەكی دا ل 6/11/2022 خۆلا پەڕلەمانی دا ب دوماهیك هێت. ئەڤێ یەكێ ژی نەڕازیبوونا پشكەك ژ فڕاكسیۆنان ل دویڤ خۆ ئینا و چەندین پەڕلەمانتاران دەست ژكاركێشان و چەند بەربژارەكێن پێشتر یێن هەلبژارتنان سویندا یاسایی خوارن و چوونە جهێ وان. ل دور ڤی بابەتی دكتور وەعدی سلێمان مزوری، ڕاوێژكارێ یاسایی یێ پەڕلەمانێ كوردستانێ ب ئاژانسا خانی ڕاگەهاند، ل دویڤ بڕیارا دادگەها فیدڕالی، پەڕلەمانتارییا وان ژی دێ هێتە ڕەتكرن و ئەوێن دەستژكاركێشاین، ئەگەر وان بڤێت دێ مامەلەیێن خانەنشینبوونێ بۆ هێنە دروستكرن. ژبەركو ل دویڤ بڕیارا یاسایێ ئەو بڕیارێن پشتی دڕێژكرنا تەمەنێ پەڕلەمانی دەركەفتین كار پێ ناهێتەكرن. لێ ناڤبری دۆپاتكر كو ئەو پارێن وان وەرگرتین، ژێ ناهێنە وەرگرتن.