<h3 style="text-align: justify;"><span style="font-size: 18pt;">ل رۆژا شه‌شى هه‌یڤا 11 یا سالا 2022ێ دادگه‌ها فیدرالییا عیراقێ بریارا به‌رده‌وامبوونا كارێ خۆلا پێنجێ یا په‌رله‌مانێ كوردستانێ هه‌لوه‌شاند، هه‌ر بریاره‌ك و قانوونه‌كا پشتى وێ مێژوویێ ژ په‌رله‌مانێ كوردستانێ ده‌ركه‌ڤت بیت، دێ ب هه‌لوه‌شاندى هێته هژمارتن.</span></h3> <h3 style="text-align: justify;"><span style="font-size: 18pt;">شیره‌تكارێ په‌رله‌مانتارێ كوردستانێ راگه‌هاند، پشتى بریارا دادگه‌ها فیدرالى، یا ره‌وابوو په‌رله‌مانێ كوردستانێ ژى پێنگاڤه‌كێ پاڤێژیت و ئه‌ندامێن خوه خانه‌نشین بكه‌ت ئه‌گه‌ر وان حه‌زا هندێ هه‌بیت، ئاماژه ب هندێ دا، یا پێدڤى بوو سه‌رۆكایه‌تییا په‌رله‌مانى لیسته‌یا ناڤان دروستكربا و هنارتبا رێڤه‌به‌رییا خانه‌نشینییێ، لێ ژبه‌ركو دنوكه‌دا سه‌رۆكایه‌تییا په‌رله‌مانى نه‌مایه، سه‌رۆكایه‌تییا دیوانا په‌رله‌مانى كو ژلایێ ئیداریڤه چ په‌یوه‌ندى ب په‌رله‌مانیڤه نینه و چ ئه‌ندام ژى ل په‌رله‌مانى نینن، ئه‌و دێ ب ڤى كارى رابیت.</span></h3> <h3 style="text-align: justify;"><span style="font-size: 18pt;">د. وه‌عدى مزیرى شیره‌تكارێ په‌رله‌مانێ كوردستانێ بۆ ئاژانسا خانى دیاركر، هه‌تا نوكه نه‌هاتییه دیاركرن خانه‌نشینكرنا په‌رله‌مانتاران دێ ژ كیژ ژڤانى هێته هژمارتن، ژ 6-11-2022 یان ژى 1-6-2023ێ و ئه‌ڤ چه‌نده دێ ل رێڤه‌به‌رییا خانه‌نشینكرنێ هێته ئێكلاكرن.</span></h3> <h3 style="text-align: justify;"><span style="font-size: 18pt;">سه‌باره‌ت مووچه‌یێ په‌رله‌مانتاران یێ كو پشتى بریارا دادگه‌ها فیدرالییا عیراقێ هاتییه دان، د. وه‌عدى مزیرى ئاشكراكر، ل دووڤ ده‌ستوورى و قانوونێ، هه‌ر بریاره‌ك یان قانوونه‌كا گرێداى بابه‌تێن دارایى هاتبیته ده‌ركرن، پاشڤه‌چوون بۆ نینه، ئانكو ئه‌و مووچه‌یێ په‌رله‌مانتاران پشتى بریارا دادگه‌ها فیدرالى وه‌رگرتى، دێ بۆ وان مینیت و ژێ ناهێته وه‌رگرتن، ب بوچوونا وى خانه‌نشینكرنا په‌رله‌مانتاران دێ ژ رۆژا ئێكى خزیرانا 2023ێ هێته هژمارتن.</span></h3> <h3 style="text-align: justify;"><span style="font-size: 18pt;">ئاشكرا ژى كر، په‌رله‌مانێ كوردستانێ 111 ئه‌ندام هه‌نه، ب تنێ حه‌فت ئه‌ندامان ره‌تكرییه بهێنه خانه‌نشینكرن و حه‌زدكه‌ن ڤه‌گه‌رنه سه‌ر كارێن خوه یێن به‌رێ، 104 په‌رله‌مانتاران حه‌زا خوه بۆ خانه‌نشینكرنێ ده‌ربرییه، ل دووڤ قانوونا چاكسازییێ دوو جۆرێن په‌رله‌مانتاران بۆ خۆلا پێنجێ هه‌نه، جۆرێ ئێكێ ژییێ وان ژ 45 سالییێ بوورییه و 15 سالان خزمه‌ت هه‌یه، ئه‌ڤ جۆره په‌رله‌مانتاره دێ بێى ئاریشه مووچه‌ى وه‌رگرن، لێ مووچه‌یێ وان دێ ب رێژه‌یا 50%ێ بیت ئانكو دێ نیڤ مووچه‌ى وه‌رگرن، جۆرێ دووێ یێ په‌رله‌مانتاران ژییێ وان ژ 45 سالییێ كێمتره، ژ 15 سالان كێمتر خزمه‌ت هه‌یه و هنده‌ك ژ وان چ سالێن خزمه‌تێ ژى نینن، ب تنێ بۆ ڤێ خۆلێ قانوونا چاكسازییێ ب مه‌رجه‌كى رێك دا وان بهێنه خانه‌نشینكرن ئه‌و ژى، دبیت ب رێژه‌یا 25%ێ مووچه‌ى وه‌ربگرن و گه‌له‌ك ژ وان ناگه‌هنه وێ رێژه‌یێ ژى ژبه‌ركو چ خزمه‌ت نینه و به‌رى نوكه فه‌رمانبه‌ر نه‌بووینه، دێ ب تنێ چار سالێن په‌رله‌مانتارییێ وه‌كو خزمه‌ت بۆ وان هێته هژمارتن.</span></h3> <h3 style="text-align: justify;"><span style="font-size: 18pt;">زێده‌تر شیره‌تكاری په‌رله‌مانێ كوردستانێ ل دۆر وان پرۆژه‌یێن ل په‌رله‌مانى هاتینه په‌سه‌ندكرن گوت : هه‌ر پرۆژه‌یه‌كێ ژ حكومه‌تێ ره‌وانه‌ى په‌رله‌مانى هاتبیته كرن، یێ هاتییه په‌سه‌ندكرن، لێ ب مخابنیڤه قانوونا كارى و قانوونا په‌روه‌ردێ كو گه‌له‌ك دگرنگن، هاتبوونه په‌سه‌ندكرن و ل رۆژنامه‌یا وه‌قائع كوردستان ژى هاتبوونه به‌لاڤكرن، لێ ژبه‌ركو پشتى رۆژا شه‌شى هه‌یڤا چریا دووێ یا سالا 2022ێ بوون، هاتنه هه‌لوه‌شاندن، ئه‌ڤ پرۆژه دێ بۆ كابینه‌یا بهێت یا حكومه‌تا هه‌رێما كوردستانێ مینیت كا دێ چه‌وا سه‌ره‌ده‌رییێ دگه‌لدا كه‌ت.</span></h3>
