شیرەتکاره‌كێ حوکمەتا ھەرێمێ: ھەموو بریارێن سەردەمێ رژێما بەعس ھاتینە راگرتن

ئاژانسا خانی ” تایبەت:

شیرەتکارەکێ حوکمەتا ھەرێما کوردستانێ ئاشکرا کر، ھەموو بڕیارێن سەردەمێ رژێما بەعس ھاتینە راگرتن و کار ب چ بڕیارەکێ ناھێتە کرن، ب تایبەتی ئەو بڕیارێن لدۆر گرێبەستێن زەڤییێن چاندنێ ھاتینە دان.

دژوار فایەق، شیرەتکارێ سەرۆکاتییا جڤاتا وەزیران بۆ مادێ ١٤٠ بۆ ئاژانسا خانی دیار کر: ل ناڤەراستا سالا ٢٠١٤ ێ پڕۆژە قانوونەک پێشکێشی پەرلەمانێ عێراقێ ھاتییە کرن ژبۆ ھەلوەشاندنا ھەموو بڕیارێن سەردەمێ رژێما بەعسا ژناڤچوویین یێن کو بناڤێ جڤاتا سەرکردایەتییا شۆره‌شێ ھاتینە دەرکرن، ھەموو بزاڤان دێ کەین بۆ ھەلوەشاندنا وان بڕیاران یێن ژلایێ جڤاتا بناڤێ سەورە ھاتینە دەرکرن ب تایبه‌تی ژی ل دژی کوردان.

ناڤهاتی گۆت ژی” ب نڤیسارا فەرمی ھەموو دەزگەھێن حوکمەتا عێراقێ ھاتینە ئاگەھدار کرن، کو ھەموو بڕیارێن سەردەمێ رژێما بەعس ھاتینە راگرتن و کار ب چ بڕیاران ناھێتە کرن، لەوما نابیت گرێبەستێن جۆتیاران بھێنە نووکرن، چونکی ب بریارا رژێما بەعس ئه‌و گرێبه‌سته‌ ھاتینە ده‌ركرن.