سه‌رۆكێ هه‌رێما كوردستانێ پێشوازى ل شانده‌كێ ئوردنى كر

نێچیرڤان بارزانى سه‌رۆكێ هه‌رێما كوردستانێ پێشوازى ل ئه‌حمه‌د خه‌لایله‌ جێگرێ ئێكێ یێ سه‌رۆكێ جڤاتا نوونه‌رێن ئوردنێ و شاندێ دگه‌لدا كر و د دیداره‌كێدا پێشڤه‌برنا هاریكارییێن هه‌ڤپشك یێن دناڤبه‌را هه‌رێما كوردستانێ و وه‌لاتێ ئوردانێدا هاته‌ گوتوبێژكرن.

سایتی سه‌رۆكایه‌تییا هه‌رێما كوردستانێ به‌لاڤكر، نێچیرڤان بارزانى سه‌رۆكێ هه‌رێما كوردستانێ پێشوازى ل ئه‌حمه‌د خه‌لایله‌ جێگرێ ئێكێ یێ سه‌رۆكێ جڤاتا نوونه‌رێن ئوردنێ كر، د كۆمبوونه‌كێدا په‌یوه‌ندییێن ئوردنێ دگه‌ل عیراقێ و تایبه‌تى په‌یوه‌ندیێن مێژوویى یێن دگه‌ل هه‌رێما كوردستانێ و پێشڤه‌برنا هاریكارییێن هه‌ڤپشك دبوارێن جۆدا دا هاتنه‌ گوتوبێژكر.

نێچیرڤان بارزانى ئه‌ڤ سه‌ره‌دانا ب نیشانا پشته‌ڤانییا ئوردنێ ل عیراقێ و هه‌رێما كوردستانێ ل قه‌له‌م دا و ئاماژه‌ ب هندێ دا كو هه‌رێما كوردستانێ په‌یوه‌ندییێن ئوردن و عیراقێ ب گرنگ دزانیت و پشته‌ڤانییێ لێ دكه‌ت، هه‌روه‌سا سوپاسى و پێزانینێن هه‌رێما كوردستانێ بۆ پشته‌ڤانیكرنا شاهـ عه‌بدولایێ دووێ شاهێ ئوردنێ ل هه‌رێما كوردستانێ و عیراقێ دووپاتكرن.

ژلایێ خۆڤه‌ شاندێ مێڤان زێده‌بارى كو سوپاسى و پێزانین بۆ رۆلێ هه‌رێما كوردستانێ د شكاندنا داعشێدا هه‌بوون، مه‌نده‌هۆشییا خوه‌ ب پێشكه‌ڤتنێن هه‌رێما كوردستانێ ده‌ربری و دووپاتى ل پشته‌ڤانییا وه‌لاتێ خوه‌ ل عیراقێ و هه‌رێما كوردستانێ كر، هه‌روه‌سا به‌حسا ده‌رفه‌تا هاریكارییا هه‌ڤپشك یا هه‌ردوو لایان د بوارێن ساخله‌مى، گه‌شتیارى، كولتوورى، په‌روه‌رده‌ و ئالۆگۆرا بازرگانیدا كر.