<h3 style="text-align: justify;"><span style="font-size: 18pt;">حكومه‌تا هه‌رێما كوردستانێ ب هه‌ماهه‌نگى دگه‌ل هه‌ڤپه‌یمانان بۆ كوردستانه‌كا بهێزتر، بریارا ئێكخستن و رێكخستنا هێزێن پێشمه‌رگه‌ى ژ چارچووڤێ وه‌زاره‌تا كاروبارێن پێشمه‌رگه‌ى یا حكومه‌تا هه‌رێما كوردستانێ دا، د دووماهی پێنگاڤ ژیدا و ب بریارا مه‌سرور بارزانى سه‌رۆكوه‌زیرێن هه‌رێما كوردستانێ، سێ لیوایێن دى یێن نوو هاتنه دروستكرن و چوونه سه‌ر میلاكێ وه‌زاره‌تا پێشمه‌رگه‌ى.</span></h3> <h3 style="text-align: justify;"><span style="font-size: 18pt;">ئه‌و سێ لیوایێن ل ڤێ دووماهییێ هاتینه پێكئینان ژ لیوایێن 28،26 و 30 بوون ژمارا وان پێنج هزار و 400 ئه‌فسه‌ر و پێشمه‌رگه بوون، ژ هێزا یه‌كه‌یا 70 هاتبوونه پێكئینان، نوكه ل ژێر سه‌رپه‌رشتییا فرقه‌یا دوو یا سه‌رۆكایه‌تییا ئه‌ركانان هاتینه كۆمكرن.</span></h3> <h3 style="text-align: justify;"><span style="font-size: 18pt;">ل دۆر هێزێن ده‌رڤه‌ى وه‌زاره‌تان و رێكخستنا وان ژ چارچووڤێ چاكسازییێن هێزێن پێشمه‌رگه‌ى، لیوا حكمه‌ت عومه‌ر رێڤه‌به‌رێ گشتییێ كاروبارێن تاك و خۆبه‌خشان ل وه‌زاره‌تا كاروبارێن پێشمه‌رگه‌ى راگه‌هاند، هه‌ر ل ده‌ستپێكا كابینه‌یا نه‌هێ و ب فه‌رمانا مه‌سرور بارزانى سه‌رۆكێ حكومه‌تا هه‌رێما كوردستانێ و ب هاریكارییا تیما هه‌ڤپه‌یمانان، چاكسازى بۆ هێزێن هه‌رێما كوردستانێ ب رێكا تیمه‌كا نوو ده‌ستپێكر و هه‌تا نوكه‌ژى یا به‌رده‌وامه، هه‌ر دماوێ ڤێ كابینه‌یێدا لیوایێن ( 30،26،24،23،22،21،19،18،17،15 ) هه‌روه‌سا هه‌ردوو لیوایێن 25 و 27 دناڤ پرۆسه‌یێدانه و ئه‌وژى 90%ێ كارێن وان تمامبووینه و ل ڤان نێزیكان دێ چنه سه‌ر میلاكێ وه‌زاره‌تا كاروبارێن پێشمه‌رگه‌ى.</span></h3> <h3 style="text-align: justify;"><span style="font-size: 18pt;">پرۆسه‌یا ئێكخستنا هێزێن پێشمه‌رگه‌ى ژ چارچووڤێ ئه‌وان چاكسازییانه یێن دهێنه‌كرن، لیوا حكمه‌ت عومه‌ر ل دۆر رێكارێن وێ پرۆسه‌یێ ئاماژه ب هندێ كر، ل دووڤ رێنمایێن سه‌ربازى و ل دووڤ قانوونا ژماره 38 یا چاكسازییێ، ئه‌و دێ ب رێكا لژنه‌یان دیداران دگه‌ل تماما ئه‌وان هێزان كه‌ن یێن دێ بۆ سه‌ر میلاكێ وه‌زاره‌تێ هێنه ڤه‌گۆهاستن، هه‌روه‌سا ئه‌وێن مامه‌له‌یێن خانه‌نشینییێ بۆ دهێنه كرن، دێ هێنه جۆداكرن، هه‌ڤده‌م ئه‌وێن دهێنه پۆلین كرن كو بریندارن یان په‌ككه‌ڤتینه و بۆ لژنه‌یا نوشدارى هێنه هنارتن، دێ ب هه‌مان شێوه ل یه‌كه‌یێن وان مامه‌له‌یێن په‌ككه‌ڤتن یان برینداربوونا وان هێنه ب رێڤه‌برن، ئه‌وێن شیانێن سه‌ربازییێ ژى هه‌ین، دێ هێنه رێكخستن و بۆ سه‌ر میلاكێ وه‌زاره‌تا كاروبارێن پێشمه‌رگه‌ى هێنه ڤه‌گۆهاستن، له‌وما تمامكرنا ڤێ پرۆسه‌یێ پێدڤى ب ده‌مییه.</span></h3> <h3 style="text-align: justify;"><span style="font-size: 18pt;">سایتێ حكومه‌تا هه‌رێما كوردستانێ راگه‌هاند، ژ چارچووڤێ بزاڤێن كابینه‌یا نه‌هێ، هێزێن پشته‌ڤانییا ئێك و دوو چوونه سه‌ر میلاكێ وه‌زاره‌تا كاروبارێن پێشمه‌رگه‌ى، هه‌تا نوكه 28 لیوا ژ چارچووڤێ چاكسازییێن حكومه‌تێ هاتینه پێكئینان، پرۆسه ل ژێر سه‌رپه‌رشتییا هێزێن هه‌ڤپه‌یمانان و وه‌زاره‌تا كاروبارێن پێشمه‌رگه‌ى و ل دووڤ وێ پلانا بۆ هاتییه دانان، هه‌تا دوو بۆ سێ سالێن دى ل تماما هێزێن هه‌رێما كوردستانێ یا به‌رده‌وام بیت.</span></h3>
