رێڤه‌به‌رێ گشتى یێ هاوارهاتنێ ل رێكخستنا ساخله‌مییا جیهانى راگه‌هاند، 28 ملیۆن كه‌سان ل جیهانێ ڤاكسینێ دژى كۆرۆنایێ وه‌رگرتییه.
مایكل راین، رێڤه‌به‌رێ گشتى یێ هاوارهاتنێ ل رێكخستنا ساخله‌مییا جیهانى راگه‌هاند، د ده‌مێ 36 رۆژێن بوورى دا، 28 ملیۆن كه‌سان ل 46 وه‌لاتێن جیهانێ ڤاكسینێ كۆرۆنایێ وه‌رگرتییه.
سه‌ره‌راى وێ یه‌كێ هه‌وا ڤاكسیندانێ ل هنده‌ك وه‌لاتان ده‌ستپێكرییه، لێ مایكل راینى دلگرانییا خوه ل سه‌ر بله‌ز به‌لاڤبوونا جۆرێ نوو یێ ڤایرۆسێ كۆرۆنایێ ده‌ربرى.
راینى دیار ژى كر، ئه‌و دلگرانن كو بتنێ وه‌لاتێن ده‌وله‌مه‌ند هه‌وا ڤاكسیندانێ ده‌ستپێكرییه و تا نها 28 ملیۆن قۆرچێن ڤاكسینى هاتینه به‌لاڤكرن و مۆله‌تا بكارئینانێ ب پێنج ڤاكسینان هاتییه دان.
بریتانیا وه‌لاتێ ئێكێ بوو ل رۆژا 8ى كانوونا ئیكێ یا سالا 2020 هه‌وا ڤاكسیندانا كۆرۆنایێ ده‌ستپێكرى و ده‌زگه‌هێ ده‌رمانسازى یێ ئێكه‌تییا ئه‌ورۆپا مۆله‌تا بكارئینانا ڤاكسینێ فایزه‌ر و بایۆنتیك دا، ل رۆژهه‌لاتا ناڤین ژى ڤاكسینێ كۆرۆنایێ گه‌هشته ئه‌ره‌بستانا سعوودیێ.
هه‌ژمارا تووشبوویێن كۆرۆنایێ ل سه‌رانسه‌رى جیهانێ نێزیكى 93 ملیۆن كه‌سایه، تا نها نێزیكى 2 ملیۆن كه‌سان ب وى ئه‌گه‌رى گیانێ خۆه ژ ده‌ست دایه.
