سه‌رۆكێ هه‌رێما كوردستانێ پێشوازى ل كونسۆلێ نوو یێ هندستانێ كر

نێچیرڤان بارزانى سه‌رۆكێ هه‌رێما كوردستانێ د دیداره‌كێدا دگه‌ل مادان گۆپال كونسۆلێ گشتییێ نوو یێ هندستانێ ل هه‌رێما كوردستانێ و شاندێ دگه‌لدا، زێده‌بارى ب خێرهاتنێ، پشته‌ڤانییا خوه‌ و لایه‌نێن په‌یوه‌ندیدارێن هه‌رێما كوردستانێ بۆ سه‌رخستنا ئه‌ركێ وى و پێشڤه‌برنا په‌یوه‌ندییێن هندستانێ دگه‌ل هه‌رێما كوردستانێ ده‌بری.

سه‌رۆك نێچیرڤان بارزانى دووپاتكر، هندستان وه‌لاته‌كه‌، عیراق و هه‌رێما كوردستانێ ب شێوه‌یه‌كێ گشتى دشێن دگه‌له‌ك بواراندا مفاى ژ شاره‌زایى و بسپۆرى و ئه‌زموونێن وێ وه‌ربگرن، له‌وما یا گرنگه‌ هه‌رێما كوردستانێ گرنگییێ ب په‌یوه‌ندییان دگه‌ل هندستانێ بده‌ت، ل دۆر ڤێ چه‌ندێ ب تایبه‌تى ئاماژه‌ ب گرنگییا ڤه‌كرنا گه‌شتێن ئاسمانییێن ئێكسه‌ر یێن دناڤبه‌را هه‌رێما كوردستانێ و هندستانێدا كر.

ژلایێ خۆڤه‌ كونسۆلێ گشتییێ نوو یێ هندستانێ خۆشحالییا خوه‌ ب ده‌ستبكاربوونێ ل هه‌رێما كوردستانێ نیشاندا و دووپاتى ل كار و بزاڤێن خوه‌ بۆ پێشڤه‌برنا په‌یوه‌ندییێن وه‌لاتێ خوه‌ دگه‌ل هه‌رێما كوردستانێ كر.