ل حه‌فتییا بهێت وه‌زیرێ بازرگانییا توركیا دێ سه‌ره‌دانا عیراقێ كه‌ت، ل هه‌یڤا بهێت ئه‌ردوگان ژى دێ هێت

له‌تیف ره‌شید و هاكان فیدان كۆمبوون، چاڤه‌رێ دهێته‌كرن ل حه‌فتییا بهێت وه‌زیرێ بازرگانییا توركیا سه‌ره‌دانا عیراقێ بكه‌ت، وه‌زیرێ ده‌رڤه‌ یێ عیراقێ دیاركر، ڕه‌جه‌ب ته‌یب ئه‌ردوگان یێ رژده‌ سه‌ره‌دانا عیراقێ بكه‌ت.

له‌تیف ره‌شید سه‌رۆككۆمارێ عیراقێ ل كۆچكا سه‌لام پێشوازى ل هاكان فیدان وه‌زیرێ ده‌رڤه‌ یێ توركیا و شاندێ دگه‌لدا كر.

نڤێسینگه‌ها سه‌رۆككۆمارێ عیراقێ ل دۆر كۆمبوونێ به‌لاڤكر، دكۆمبوونێدا هه‌ردوو لایان په‌یوه‌ندییێن مێژووییێن دناڤبه‌را هه‌ردوو وه‌لاتاندا گوتوبێژكرن و دووپاتى ل گرنگییا كاركرنێ بۆ ب هێزكرن و پێشڤه‌برن و به‌رفره‌هكرنا ئاستێ هاریكارییان دبوارێن ئابوورى، بازرگانى، ژینگه‌هى و كه‌یسا ئاڤ و وزێدا كر، ب شێوه‌یه‌كى كو خزمه‌تێ ب به‌رژه‌وه‌ندییێن هه‌ڤپشكێن گه‌لێن عیراقێ و توركیا بكه‌ت.

وه‌كو دراگه‌هاندنێدا هاتى، وه‌زیرێ ده‌رڤه‌ یێ توركیا ب سه‌رۆككۆمارێ عیراقێ راگه‌هاندییه‌، چاڤه‌رێ دهێته‌كرن ل حه‌فتییا بهێت وه‌زیرێ بازرگانییا توركیا سه‌ره‌دانا عیراقێ بكه‌ت و سه‌رۆككۆمارى ژى هیڤى هه‌نه‌ سه‌ره‌دانا وى ببته‌ پالده‌ر بۆ بلندكرنا ئاستێ په‌یوه‌ندییێن دوو قۆلى.

ل دۆر سه‌ره‌دانا ئه‌ردوگانى بۆ عیراقێ، وه‌زیرێ ده‌رڤه‌ یێ توركیا ب سه‌رۆككۆمارى گوت : ڕه‌جه‌ب ته‌یب ئه‌ردوگان سه‌رۆككۆمارێ توركیا یێ رژده‌ سه‌ره‌دانا عیراقێ بكه‌ت، داكو دووڤچوونا ئاریشه‌یێن نوكه‌ ژبلى وان كه‌یسێن دبه‌رنامه‌یێ سه‌ره‌دانێ هه‌یى بكه‌ت، له‌تیف ره‌شیدى ژى ژلایێ خۆڤه‌ خۆشحالییا خوه‌ بۆ سه‌ره‌دانا ئه‌ردوگانى بۆ به‌غدا ده‌ربری.

ژلایه‌كێ دیڤه‌ دكتۆر هیشام عه‌له‌وى بریكارێ وه‌زاره‌تا ده‌رڤه‌ یا عیراقێ ئاشكراكر، ئه‌و یێ پشتراست نینه‌ دڤێ هه‌یڤێدا ئه‌ردوگان سه‌ره‌دانا عیراقێ بكه‌ت، سه‌ره‌دانا وى دێ چیته‌ هه‌یڤا بهێت.