سه‌رۆكێ حكومه‌تا هه‌رێما كوردستانێ پێشوازى ل وه‌زیرێن ده‌رڤه‌ و وزێ و ژێده‌رێن سروشتى یێن توركیا كر

دكۆمبوونا سه‌رۆكێ حكومه‌تا هه‌رێما كوردستانێ و وه‌زیرێن ده‌رڤه‌ و وزێ و ژێده‌رێن سروشتى یێن توركیا دا، دووپاتى ل پێشڤه‌برنا په‌یوه‌ندییێن دناڤبه‌را هه‌رێما كوردستانێ و توركیادا و ده‌ستپێكرنا هنارده‌كرنا نه‌فتا هه‌رێما كوردستانێ ب رێكا به‌نده‌رێ جه‌یهان یێ توركیا هاته‌ كرن.

مه‌سرور بارزانى سه‌رۆكێ حكومه‌تا هه‌رێما كوردستانێ پێشوازى ل هاكان فیدان وه‌زیرێ ده‌رڤه‌ یێ توركیا كر و د دیداره‌كێدا كو ئه‌لپئه‌رسلان به‌یره‌كتار وه‌زیرێ وزێ و ژێده‌رێن سروشتى یێ توركیا تێدا یێ ئاماده‌بوو، دووماهى پێشهاتێن عیراقێ و ده‌ڤه‌رێ و پێشڤه‌برنا په‌یوه‌ندییێن دوو لایانه‌ هاتنه‌ گوتوبێژ‌كرن.

سه‌رۆكوه‌زیران مه‌سرور بارزانى دووپاتى ل گرنگییا ب هێزكرنا په‌یوه‌ندییان دگه‌ل توركیا دبوارێن ئالوگۆرا بازرگانى و ئاسانكاریكرن بۆ هاتنوچوونا گه‌شتیارێن هه‌ردوو لایاندا كر.

ته‌وه‌ره‌كێ دییێ كۆمبوونێ یێ تایبه‌ت بوو ب پێدڤى و گرنگییا ده‌ستپێكرنا هنارده‌كرنا نه‌فتا هه‌رێما كوردستانێ ب رێكا به‌نده‌رێ جه‌یهان یێ توركیا و نه‌هێلانا هه‌موو ئاسته‌نگ و ئاریشه‌یان د رێكا ڤى بابه‌تیدا، ژبه‌ركو راوه‌ستاندنا هنارده‌كرنا نه‌فتێ، زیان ب هه‌موو لایان گه‌هاندییه‌.

هه‌روه‌سا دپشكه‌كا دییا دانوستاندناندا، به‌حسا پرۆژه‌یێ به‌رنیاس ب ( رێكا گه‌شه‌پێدانێ ) و گرێدانا وه‌لاتێن كه‌نداڤ و عیراقێ ب توركیا و جیهانێڤه‌ ب رێكا هێلا ئاسنى هاتنه‌ كرن، ل دۆر ڤێ چه‌ندێ سه‌رۆكێ حكومه‌تێ دووپاتكر، پێدڤییه‌ بجهئینانا پرۆژه‌ى ب ره‌زامه‌ندى و هه‌ماهه‌نگیكرنێ دگه‌ل هه‌رێما كوردستانێ بیت، ب شێوه‌یه‌كى بیت كو د به‌رژه‌وه‌ندییا هه‌موو وه‌لاتى و پێكهاته‌یێن جۆدا یێن عیراقێدا بیت.

ژلایێ خۆڤه‌ وه‌زیرێ ده‌رڤه‌ یێ توركیا خۆشحالییا خوه‌ ب سه‌ره‌دانكرنێ بۆ هه‌رێما كوردستانێ نیشاندا و ئاماده‌ییا وه‌لاتێ خوه‌ بۆ مۆكۆمكرنا په‌یوه‌ندییان دگه‌ل هه‌رێما كوردستانێ د هه‌موو بواراندا ده‌ربرى.

پاشان سه‌رۆكێ حكومه‌تێ و وه‌زیرێ ده‌رڤه‌ یێ توركیا د داخویانییه‌كێدا بۆ ده‌زگه‌هێن راگه‌هاندێ دیاركر، دووپاتییێ ل پێشڤه‌برنا په‌یوه‌ندییێن دوو لایانه‌ دبوارێن ئابوورى و بازرگانى و هه‌ماهه‌نگییێ ژ پێخه‌مه‌ت ئاسایش و سه‌قامگێرییا عیراقێ و هه‌رێما كوردستانێ و ده‌ڤه‌رێدا دكه‌ن.