<h3 style="text-align: justify;"><span style="font-size: 18pt;">نمره‌یێن ده‌رچوویێن پۆلا 12ێ ئاماده‌یى یێن هه‌رسێ پشكێن زانستى، وێژه‌یى و پیشه‌ی كو ژماران وان 47 هزار و 629 ده‌رچووینه، ژلایێ وه‌زاره‌تا په‌روه‌ردێڤه راده‌ستى وه‌زاره‌تا خواندنا بلند و ڤه‌كۆلینێن زانستى هاتنه‌كرن، داكو ژ چارچووڤێ سیسته‌مێ زانكۆلاین بۆ خواندنێ ل زانكۆ و په‌یمانگه‌هان كار ل سه‌ر بهێته كرن.</span></h3> <h3 style="text-align: justify;"><span style="font-size: 18pt;">ل دووڤ راگه‌هاندنه‌كا وه‌زاره‌تا خواندنا بلند، ئارام محه‌مه‌د قادر وه‌زیرێ خواندنا بلند و ڤه‌كۆلینێن زانستى پێشوازى ل د.ئالان حه‌مه سه‌عید سالح وه‌زیرێ په‌روه‌ردێ و شاندێ دگه‌لدا كر، كو ژ بریكار و شیره‌تكار و رێڤه‌به‌رێن گشتی ل وه‌زاره‌تا په‌روه‌ردێ پێكهاتبوون.</span></h3> <h3 style="text-align: justify;"><span style="font-size: 18pt;">ئاماژه ب هندێ ژى كر، شیره‌تكار و رێڤه‌به‌رێن گشتییێن وه‌زاره‌تا خواندنا بلند و ڤه‌كۆلینێن زانستى دكۆمبوونێدا ئاماده‌بوون، وه‌زیرێ خواندنا بلند و ڤه‌كۆلینێن زانستى راگه‌هاند، ئه‌نجامێن تاقیكرنێن گشتى ژلایێ وه‌زاره‌تا په‌روه‌ردێڤه ئاراسته‌یى وان هاتنه كرن و ژ ئه‌ڤرۆ دێ كار ل سه‌ر هێته كرن، وان به‌رهه‌ڤییێن خوه بۆ هندێ كرینه كو ل زووترین ده‌م پرۆسه‌یا پێشكێشكرنێ بۆ زانكۆیان ب رێكا سیسته‌مێ زانكۆلاین ده‌ستپێبكه‌ت.</span></h3> <h3 style="text-align: justify;"><span style="font-size: 18pt;">ئه‌وژى دیاركر، ئالان حه‌مه سه‌عید سالح وه‌زیرێ په‌روه‌ردێ دگه‌ل دیاركرنا داتا و هووركارییان ل دۆر ژمارا قوتابى و خوێندكاران، ئاماژه ب سه‌ركه‌ڤتنا پرۆسه‌یا تاقیكرنێن 12ێ ئاماده‌یى ب هه‌موو پشكێن وێڤه كر، ئه‌و میكانیزمه ژى روونكر یاكو وه‌زاره‌تا وان بۆ پرۆسه‌یا تاقیكرنێن گشتی بجهئینای.</span></h3> <h3 style="text-align: justify;"><span style="font-size: 18pt;">دووپات ژى كر، دپشكه‌كا دییا كۆمبوونێدا رێڤه‌به‌رییا تاقیكرنان ل وه‌زاره‌تا په‌روه‌ردێ سه‌رجه‌مێ داتا و ئامارێن قوتابى و خوێندكارێن پۆلا 12ێ ئاماده‌یى یێن زانستى، وێژه‌ى و پیشه‌یى ل سالا خواندنێ ( 2022 – 2023 )ێ دیاركرن، هه‌ڤده‌م ژماره‌یا ده‌رچوویێن پشكێن زانستى و وێژه‌ى و زانستى و رێژه‌یا نمره‌یێن قوتابی و خوێندكاران ب ده‌ستڤه‌برین دیاركرن، پشكدارێن كۆمبوونێ ژى هه‌لسه‌نگاندن ل دۆر رێژه‌یا ده‌رچوویان و میكانیزما ته‌رخانكرنا كورسییێن خواندنێ ل زانكۆ و په‌یمانگه‌هان كر.</span></h3> <h3 style="text-align: justify;"><span style="font-size: 18pt;">به‌حس ل هندێ ژى كر، هه‌ماهه‌نگییا كارێ هه‌ردوو وه‌زاره‌تان ب تایبه‌ت پشكدارییا مامۆستایان د پرۆژه‌یێ ڤه‌كرنا خۆلێن راهێناناندا بۆ مامۆستایێن وه‌زاره‌تا په‌روه‌ردێ ل زانكۆیێن هه‌رێما كوردستانێ و ڤه‌كرنا په‌یمانگه‌هێن پیشه‌یى و پێشڤه‌برنا خواندنا پیشه‌ى ل دووڤ پیدڤییێن بازارێ كارێ هه‌رێما كوردستانێ پشكه‌كا دییا ته‌وه‌رێن كۆمبوونێ بوو ، هه‌ردوو لایان دوى چارچووڤه‌یدا دووپاتى ل گرنگییا هاریكارى و هه‌ماهه‌نگییا دناڤبه‌را هه‌ردوو وه‌زاره‌تاندا كر و راگه‌هاند، ل پاشه‌رۆژێ میكانیزمه‌ك ب مه‌ره‌ما هه‌ماهه‌نگییا كاركرنێ بۆ بجهئینانا پرۆژه‌یان دێ هێته دانان.</span></h3>
