<h3 style="text-align: justify;"><span style="font-size: 18pt;">به‌رپرسێ فه‌رمانگه‌ها په‌یوه‌ندییێن ده‌رڤه یێ حكومه‌تا هه‌رێما كوردستانێ راگه‌هاند، توركیا لایه‌نگرێ هنارتنا نه‌فتا كوردستانێ یه و راگرتنا هنارتنا نه‌فتێ ژى ب بهایێ زێده‌تر ژ پێنج ملیار دۆلاران زیانێن دارایى ب حكومه‌تا عیراقێ گه‌هاندییه و گوت : سوبه‌هى جڤاتا وه‌زیران دێ كۆمبیت و وان داخواز ژ كونسۆل و نوونه‌رێن وه‌لاتان كرییه هاریكارییا هه‌ولێر و به‌غدا بكه‌ن.</span></h3> <h3 style="text-align: justify;"><span style="font-size: 18pt;">سه‌فین دزه‌یى ل دۆر هنارتنا نه‌فتا كوردستانێ دیاركر، توركیا لایه‌نگرێ هندێ یه نه‌فتا هه‌رێما كوردستانێ دووباره بهێته هنارتن، هه‌رێما كوردستانێ ژى بێ گۆمان گه‌له‌ك ل هیڤییا ڤێ چه‌ندێ یه، به‌رپرسێن به‌غدا ب فه‌رمى به‌حس ل هندێ دكه‌ن كو بۆ ( هنارتنا نه‌فتا كوردستانێ ) دئاماده‌نه، لێ د راستى دا هه‌تا نوكه پێنگاڤێن پراكتیكى نه‌هاڤێتینه.</span></h3> <h3 style="text-align: justify;"><span style="font-size: 18pt;">وه‌كو سه‌فین دزه‌یى دیاركرى، مه‌ره‌م ژ سه‌ره‌دانا هاكان فیدانى بۆ عیراقێ و هه‌رێما كوردستانێ، لێك نێزیككرنا هزر و بوچوونێن توركیا، عیراق و هه‌رێما كوردستانێ سه‌باره‌ت چه‌وانییا هنارتنا نه‌فتا كوردستانێ بوو، هه‌روه‌سا نه‌هێلانا وان ئاسته‌نگایه یێن ل به‌رده‌م هنارتنا نه‌فتێ هه‌ین، چ ئاسته‌نگێن هونه‌رى، سیاسى، دارایى و كارگێرى بن، بۆ هندێ بشێن ل دووڤ قانوونا بودچه‌ى دووباره ده‌ست ب هنارتنا نه‌فتا كوردستانێ بكه‌ن و بزاڤ بۆ ڤێ پێنگاڤێن دبه‌رده‌وامن.</span></h3> <h3 style="text-align: justify;"><span style="font-size: 18pt;">ل دووڤ ئاخڤتێن به‌رپرسێ فه‌رمانگه‌ها په‌یوه‌ندییێن ژ ده‌رڤه، ژ 25ى ئادارێ هه‌تا نوكه و ژ ئه‌نجامێ راگرتنا هنارتنا نه‌فتا كوردستانێ ژ ئه‌گه‌رێ بریاره‌كا دادگه‌ها نێڤده‌وله‌تى ل پاریسێ، نێزیكى پێنج ملیار و 500 ملیۆن دۆلاران زیانێن دارایى گه‌هشتینه عیراقێ، له‌وما ژلایێ ماتماتیكى ڤه لۆژیك نینه، بۆ وه‌رگرتنا ئێك ملیار و 500 ملیۆن دۆلاران ژ توركیا، ب بهایێ پێنج ملیار دۆلاران زیانێ ببینى.</span></h3>
