مه‌سرور بارزانى سه‌رۆكێ حكومه‌تا هه‌رێما كوردستانێ پێشوازى ل جه‌نه‌را جۆل ڤاۆل فه‌رمانده‌یێ گشتییێ هێزێن هه‌ڤپه‌یمانان ل عیراق و سووریا كر.
دكۆمبوونه‌كێدا كو مارك سترۆ كونسۆلێ گشتییێ ئه‌مریكا ل هه‌رێما كوردستانێ تێدا یێ ئاماده‌بوو، دووماهى پێشهات و گوهۆرینێن هه‌رێما كوردستانێ و عیراق و سووریا هاتنه گوتوبێژكرن.
ته‌وه‌ره‌كێ سه‌ره‌كییێ كۆمبوونێ یێ تایبه‌ت بوو ب دانوستاندكرنێ ده‌رباره‌ى پرۆسه‌یا چاكسازییێ ل وه‌زاره‌تا پێشمه‌رگه‌ى و پێنگاڤێن ئێكخستنا هێزێن پێشمه‌رگه‌ى و رێكخستنا پێكهاته‌یێن وێ، ل دۆر ڤێ چه‌ندێ سه‌رۆكێ حكمه‌تێ دووپاتى ل گرنگییا به‌رده‌وامبوون و بله‌زكرنا پرۆسه‌یا ئێكخستنا پێشمه‌رگه‌ى و دوورخستنا وه‌زاره‌تێ ژ هه‌ر ده‌ستێوه‌ردانه‌كا حزبى و به‌رژه‌وه‌ندییێن كه‌سى كر.
هه‌روه‌سا ئاماژه ب وان ده‌نگویان هاته دان كو ئاریشه دچاكسازییێن وه‌زاره‌تا پێشمه‌رگه‌یدا هه‌نه و گوت: پێدڤییه ده‌ستێوه‌ردانێن كه‌سایه‌تى و حزبى ژ وه‌زاره‌تێ بهێنه دوورخستن، رێگرى ل بزاڤێن سه‌رۆكوه‌زیران بۆ دانانا وه‌زیره‌كى كو شیانێن بجهئینانا كارنامه‌یا حكومه‌تێ هه‌بن، نه‌هێته‌كرن.
دپشكه‌كا دییا كۆمبوونێدا هزر و بیر ل دۆر ره‌وشا سووریا ب تایبه‌تى ئالۆزییێن ده‌ڤه‌را دێر ئه‌ززۆر و رۆژهه‌لاتا ئه‌وى وه‌لاتى هاتنه لێك گوهۆرین، هه‌ردوو لا ل سه‌ر گرنگرییا پاراستنا ئاسایش و ئاشتییا جڤاكى و ته‌باییێ دناڤبه‌را كورد و عه‌ره‌ب و پێكهاته‌یێن ده‌ڤه‌رێدا دهه‌ڤبرابوون.
