ژ ئەنجامێ پێلا بەفر و بارۆڤێ یا چاڤەرێکری ل شەڤا بوورێ ل سەنتەرێ ناحیا کانی ماسێ ٣ سم بەفر و د گەل ٣٥ ملم باران بارین و ل دەریێ سنۆریێ سەرزێری ٨ سم بەفر بارین.
مستەفا ئەحمەد، بەرپرسێ سەقاناسییێ ل کانی ماسێ بو خانی نیوز گۆت: ٢٤ سەعەتێن بووری ٣ سم بەفر و ٣٥ ملم باران ل سەنتەرێ ناحیا کانی ماسێ بارینە وپێشبینی د ھێتەکرن تا ئەڤ شەڤە یا بەردەوام بیت.
مستەفا گۆت ژی: سەرجەمێ گشتی یێ بارینا بەفر و بارانێ ل کانی ماسێ گەھشتە ٢٠٦ ملمێن بارانێ، ھەکە د گەل سالا بووری بەراورد بکەن ھێشتا گەلەک کێمە.
کەسەکی ل دەریێ سنۆریێ سەرزێری گۆت: ل شەڤا بووری ل خالا گومرکا سەرزێری ٨ سم بەفر بارینە و بۆ دەمەکی رێکا ھاتنوچوونێ ھاتە گرتن، لێ ھەر ئەڤرۆ سپێدێ تیمێن مالینا بەفرێ ل کانی ماسێ دەست ب رامالینا بەفرێ کر و نوکە ھاتنوچوون ئاسایی یە.
ژ ئالیێ خوەڤە ئومێد مەعسووم مایی، رێڤەبەرێ بیڤەلەرزێ و سەقاناسیێ ل پارێزگەھا دھۆکێ گۆت: پێلەکا بارانێ ئەڤرۆ دێ پارێزگەھا دھۆکێ ڤەگریت و تا رۆژا ئەینی دێ یا بەردەم بیت، دیسان ل رۆژا ئێکشەمبی دوبارە پێلەکا دژوارتر دێ سەرانسەری پارێزگەھێ ڤەگریت ل ھندەک جھان پلەیێن گەرمێ دێ داکەڤن بن سفرێ و ل چیا و دەڤەرێن بلند دێ بەفر باریت.
ئومێد گۆت ژی: پێشبینی دھێنەکرن تا دوماھیا حەفتیێ یا بەردەوام بیت و رێژا بارینا بەفر و بارانێ ل ھەر دەڤەرەکێ جودایە.
خانی نیوز، ئەحمەد ئەدنی
