فره‌نسا دخوازیت ئه‌و ئاریشێن دناڤبه‌را هه‌ولێر و به‌غدا دا هه‌ین بهێنه‌ چاره‌سه‌ر كرن

نوونه‌رێ حکومەتا هەرێما کوردستانێ ل فرەنسا دیار كر، فرەنسا پشته‌ڤانییێ ل سه‌ر چارەسەرکرنا ئاریشێن دناڤبه‌را هەولێر و بەغدا دا لدووڤ دەستوورێ عیراقێ دكه‌ت، بەلێ نه‌شێت فشاران بکه‌ت كو ئه‌و فشاره‌ ببنه‌ ئه‌گه‌رێ دەستێوەردانێ د کاروبارێن ناڤخۆیی یێن عێراقی دا” هه‌روه‌سا فرەنسا گه‌له‌ك هاریکارییا هەرێما کوردستانێ کرییە و د نوكه‌ دا د پرانییا بیاڤان دا هەرێما کوردستانێ باشترین پەیوەندی ل گەل فرەنسا دا هەنە.

عەلی دۆلەمەری، ئه‌و ژی گۆت: ل سالا 2001 ێ” نوونه‌راتییا حكومه‌تا هه‌رێما كوردستانێ ل وه‌لاتێ فره‌نسا هالتییه‌ دامه‌زراندن‌، هه‌رێما كوردستانێ شییایه‌ پەیوەندییێن باش ل گەل هه‌موو سازییێن فرەنسا دروست بکەت، دیسان د نوكه‌ دا د هه‌موو واران دا حکومەتا هەرێما کوردستانێ باشترین پەیوەندی ل گەل حكومه‌تا فرەنسا دا هەنه‌، دیسان چەندین رێککەفتنێن دۆستایەتی و بازرگانی و کلتووری و سیاسی و دبلۆماسی ژی دناڤبه‌را هه‌رێمێ و فره‌نسا دا هه‌نه‌، هاتنا سەرۆکێن فرەنسا سێ جاران بۆ هەرێما کوردستانێ، ده‌برینێ ژ وان په‌یوه‌ندییێن باش دكه‌ت، فرەنسا ئێک بوو ژ وان وه‌لاتێن د شەرێ داعشێ دا هاریکارییا هەرێما کوردستانێ کری.

ناڤهاتی گۆت ژی: نوكه‌ ژی فرەنسا وه‌لاته‌كێ دۆست و هه‌ڤپەیمانه‌كێ نێزیکی هەرێما کوردستانێ یه‌ و د پرانییا واران دا هاریکارییا هەرێما کوردستانێ کرییە،”فرەنسا پشتی ریفراندۆمێ و روودانێن 16 ی ئۆکتۆبەرێ هەلویسته‌كێ ئاشكرا هەبوو، راشکاوانه‌ گۆت ژی ئه‌م ل دژی چ پرۆسێن دیموکراسی نینین، گۆت ژی ئه‌ڤه‌ ئاریشه‌كا ناڤخۆییە و نه‌شێن دەستێوه‌ردانێ د کاروبارێن ناڤخۆیی یێن عێراقێ بكەن”.

عه‌لی دۆله‌مه‌ری” هیشتا دبێژیت: فره‌نسا ب ئاشكرایی گۆتییه‌” هەرێما کوردستانێ فاکتەرێ سەقامگیرییێ یه‌ و ئەگەر ئارامی ل هەرێما کوردستانێ و عێراقێ نەبیت، دێ مه‌ترسی ل سه‌ر ئورۆپا ژی په‌یدا بیت” هه‌روه‌سا دڤێت ئه‌و ئاریشێن دناڤبه‌را هه‌ولێرێ و به‌غدا دا هه‌ین” لدووڤ ده‌ستووری بهێنه‌ چارەسەر کرن، پێدڤییه‌ فیدرالی ب ته‌مامی بهێته‌ بجهئینان دناڤبه‌را عێراقێ و هەرێما کوردستانێ داكو ئه‌و ئاریشێن هه‌ین هه‌موو بهێنه‌ چارەسەر کرن.