هەر جۆتیاره‌كێ ناڤێ خۆ تۆمار نه‌كه‌ت به‌رهه‌مێ وی ژێ ناهێته‌ وه‌رگرتن

ئاژانسا خانی:

بریکارێ وەزارەتا چاندنێ ل حکومەتا هەرێما کوردستانێ گۆت: مه‌ پلانا چاندنی هه‌یه‌ و هەر جۆتیاره‌كێ ناڤێ خۆ ل فەرمانگەهێن چاندنێ تۆمار نەکه‌ت کا ئەڤ ساله‌ دێ چەند دۆنه‌مێن ئه‌ردی چینیت، ل ده‌مێ وه‌رگرتنا بەرهەمێ گه‌نمی دێ ژ سایلۆیان بێ به‌هر بیت و گه‌نمێ وی ژێ ناهێته‌ وه‌رگرتن” دیسان ل كوردستانێ دڤێت بهێته‌ دیار كرن” كانێ چه‌ند دۆنه‌مێن ئه‌ردی بكێر چاندنا گه‌نمی دهێن.

کەریم سلێمان، زێده‌تر بۆ ئاژانسا خانی دیار كر: پێدڤییه‌ هه‌ر جۆتیاره‌ك ل سنوورێ خۆ ل فەرمانگەهێن چاندنێ ناڤێ خۆ و ئه‌و ئه‌ردێ دكه‌ته‌ گه‌نم تۆمار بكه‌ت، داكو ناڤێ وی بچیته‌ دناڤا پلانا چاندنێ دا و ل ده‌مێ به‌رهه‌مێ گه‌نمی دگه‌هیت” داكو سایلۆ گەنمێ وی ژێ وەربگرن، هه‌كه‌ ناڤێن خۆ تۆمار نەکەن دێ ژ دەرڤه‌یی پلانا چاندنێ بن، چونكی دڤێت سالانه‌ ل هه‌رێما كوردستانێ بزانن چه‌ند دۆنه‌مێن ئه‌ردی كرینه‌ گه‌نم” ئه‌ڤ پلانه‌ ل عیراقێ ژی هه‌یه‌، داكو ل ده‌مێ وه‌رگرتنا گه‌نمی سایلۆ ژی  حیساباتێن خۆ بكه‌ن و به‌هه‌ڤییان بۆ وه‌رگرتنا گه‌نمی بكه‌ن.

ناڤهاتی گۆت ژی: نوكه‌ ناڤ تۆمارکرن ل فەرمانگەهان بۆ هەردو بابەتێن ئه‌ردێ ئاڤی و دێمی ل هەرێما کوردستانێ دەست پێکرییە، دیسان به‌رهه‌ڤی بۆ هندێ دهێته‌ كرن ژ لایێ وەزارەتا بازرگانی و سایلۆیان ڤه‌ كانێ دێ شێن چەند گەنمی وەرگرن، بەلێ ئه‌وێ ناڤێ خۆ تۆمار نه‌كه‌ت دێ كه‌ڤیتە دەرڤه‌یی  پلانا چاندنێ و رێك پێناهێته‌ دان گەنمێ خۆ ڕادەست بکەن” له‌وما پێدڤییه‌ هەر جۆتیاره‌ك ل ده‌ڤه‌را خۆ بچیته‌ فەرمانگەها چاندنێ و ئه‌ردێ خۆ بۆ وان دیار بکه‌ت” كانێ چ چ جۆرە ئه‌رده‌ و چەند دۆنه‌من و ب به‌لگه‌ بۆ وان ب سه‌لمینیت.