<h3 style="text-align: justify;"><span style="font-size: 18pt;">وه‌زیرێ كاره‌بێ یێ هه‌رێما كوردستانێ ڕاگه‌هاند، ل دوو حه‌فتییێن بهێت دێ ئاریشا یه‌كه‌یێن ئاكنجیبوونێ ل هه‌ولێرێ هێته چاره‌سه‌ركرن، بۆ ڤێ مه‌ره‌مێ پێشنیاز ئاراسته‌ی جڤاتا وه‌زیران هاته كرن.</span></h3> <h3 style="text-align: justify;"><span style="font-size: 18pt;">ئه‌ڤرۆ چارشه‌مبی كۆمبوونه‌كا تایبه‌ت دناڤبه‌را وه‌زاره‌تا كاره‌بێ و ده‌سته‌یا وه‌به‌رهێنانێ یا حكومه‌تا هه‌رێما كوردستانێ و لایه‌نێن په‌یوه‌ندیداردا ده‌رباره‌ی بجهئینانا بریارا سه‌رۆكوه‌زیران مه‌سرور بارزانی ب ڕێڤه‌چوو.</span></h3> <h3 style="text-align: justify;"><span style="font-size: 18pt;">کەمال محەممەد سالح، وه‌زیرێ كاره‌بێ یێ حكومه‌تا هه‌رێما كوردستانێ ڕاگه‌هاند، بریارا وه‌رگرتنا پارێن زێده ژ وه‌لاتییان ل پرۆژێن ئاكنجیبوونێ، ب رێككه‌فتن دناڤبه‌را خودانێن پرۆژاندا بوو، ئه‌و وه‌ك وه‌زاره‌تا كاره‌بێ د بێ ئاگه‌هـ بوون، وان دزانی پاره ژ خه‌لكی دهێته وه‌رگرتن، به‌لێ ئاگه‌هـ ژ زانیاریێن هوور نه‌بوو.</span></h3> <h3 style="text-align: justify;"><span style="font-size: 18pt;"> وه‌زیرێ كاره‌بێ به‌حس ل هندێ كر، دگه‌ل لایه‌نێن په‌یوه‌ندیدار ئاخفتییه و بریاردایه پێداچوونێ ب ئه‌وان بهایان بهێته‌كرن، ل هنده‌ك پرۆژێن ئاكنجیبوونێ، 120 دینار به‌رامبه‌ر هه‌ر یه‌كه‌یه‌كا كاره‌بێ ژ وه‌لاتییان د هاتنه وه‌رگرتن، پێشنیاز هاتییه كرن ئه‌و بهایه بیته 90 دینار، ئه‌وێن 144 دینارن ژی بكه‌نه 100 دینار، پێشنیاز دێ بۆ جڤاتا وه‌زیران هێته ڕه‌وانه‌كرن و بریارا په‌سه‌ندكرنا پێشنیازا ل ده‌ستهه‌لاتا جڤاتا وه‌زیرانه.</span></h3> <h3 style="text-align: justify;"><span style="font-size: 18pt;">ب گۆتنا كه‌مال محه‌مه‌د سالح، زێده‌كرنا ئه‌و رێژا پاره‌ی بۆ كاره‌با پریپه‌ید، بتنێ ل پارێزگه‌ها هه‌ولێرێ هاتییه كرن، ل پارێزگه‌هێن دیێن هه‌رێما كوردستانێ نه‌هاتییه كرن، ئاماژه ب هندێ ژی دا، پێشبینی دهێته كرن د ماوێ دووحه‌فتیێن بهێت دا ئه‌ڤ ئاریشه‌یه بهێته چاره‌سه‌ركرن.</span></h3>
