دەقێ پەیاما سەرۆك بارزانی:
بناڤێ خۆدایێ مەزن و دلۆڤان
هەمی لایەك ئاگەهدارە، هەر ژ سالا 2020 هەتا نوكە ب دەهان جاران باژێڕێ هەولێرێ كەڤتییە بەر هێرشێن نەڕەوا یێن مووشەك و درۆنێن سوپایێ پاسدارێن ئیرانێ و هێزێن سەر ب وان ڤە. ئەڤ هێرشە زۆلم و نەحەقییەكا ئاشكەرایە بەرامبەر خەلكێ كوردستانێ.
ئەنجامدەرێن وان تاوانان و ئەو كەسێن ل پشت هێرشێن سەر هەولێرێ، گەلەك باش دزانن كو بۆختان و بیانوویێن وان هیچ بنەمایەك نینە و بۆ داپوشینا كێشە و گرفتێن خۆ ئەو دەستدرێژییێ ل دژی هەولێرێ و ئاخا كوردستانێ ئەنجامددەن.
ژنوكە وێڤە بهێنفرەهییا مە سنۆرێن خۆ هەنە، د دوماهیك هێرش و تاوانا خۆ دا شەڤا بووری خێزانەكا بێ تاوان یا هەولێرێ كۆمەلكوژ كر و ب تۆندی ئیدانەیا وێ هێرشێ دكەین. گومان تێدا نینە ئەو هێرشە نەمەردایەتییە و نە شەهامەت، بەلكو ئەو پەڕێ شەرمزارییێ یە بۆ تاوانباران.
ل ڤێرێ گۆتنا من بۆ گەلێ ئیرانێ یە و هەردەم مە ڕێز و حورمەت بۆ گەلێن ئیرانێ هەیە. من دڤێت وان پشتڕاست بكەم ئەو بیانویێن هێرشكار بۆ تاوانێن خۆ ل دژی هەولێرێ و خەلكێ كوردستانێ دئینن هیچ ئەسل و بنەمایەك بۆ نینە و دویرە ژ ڕاستییێ. داخواز ژ هەوە دكەم ئەگەر هێرشكار ڕێ ب هەوە بدەن، وەرن ب چاڤێ خۆ ل هەولێرێ ڕاستییان ببینن و بزانن كو تاوانبار و هێرشكار چەوا چەواشەكارییان دەرهەقێ گەلێ كوردستانێ دا دكەن و دەنگویێن وان د بێ بنەمانە.
نابیت هەتاهەتا ئەو ل سەر ڤێ زۆلمێ د بەردەوام بن، و نابیت چ دی ل بەرامبەر ڤێ ستەم و نەحەقییێ بێدەنگ بین.
پەیاما من ژی بۆ ئەنجامدەرێن هێرشێن مووشەك و درۆنێن ئیرانی ئەوە، شەهیدكرنا ژن و زارۆكان و خەلكێ مە یێ سڤیل هیچ شانازی و سەربلندی بۆ هەوە تێدا نینە. هوین دشێن مە بكوژن، لێ پشت ڕاست بن هوین نەشێن ئیرادا مە ژمە بستینن.
