لژنه‌یا ئاسایش و به‌رگرییێ ل په‌رله‌مانێ عیراقێ لژنه‌یه‌ك بۆ لێكۆلینێ ل دۆر هێرشا مووشه‌كییا ئیرانێ بۆ سه‌ر هه‌ولێرێ پێكئینا و ل ده‌مه‌كێ نێزیك دێ ده‌ست ب كارێ خوه كه‌ت.
سه‌گڤان سندى ئه‌ندامێ لژنه‌یا ئاسایش و به‌رگرییێ ل جڤاتا نوونه‌رێن عیراقێ بۆ ئاژانسا خانى دیاركر، لژنه‌یا لێكۆلینێ ژ شه‌ش كه‌سان پێكدهێت و عه‌باس زاملى سه‌رۆكێ لژنه‌یا ئاسایش و به‌رگرییێ ل جڤاتا نوونه‌ران سه‌رۆكایه‌تییا وێ لژنه‌یێ ژى دكه‌ت.
ئاماژه ب هندێ ژى دا، ل ڤان دوو ڕۆژان دێ سه‌ره‌دانا جهێن هێرش لێ هاتییه كرن كه‌ن و ده‌ست لێكۆلینێ كه‌ن، دێ ڕێكارێن تۆند به‌رامبه‌ر ڤان هێرشان هێنه وه‌رگرتن، ژبه‌ركو ئه‌و جۆرێ مووشه‌كێن ئیرانێ بكارئیناى، ب تنێ د شه‌ڕێن مه‌زندا دهێنه بكارئینان، ب دژى باژێرێن ئارام و ته‌نا وه‌كو هه‌ولێرێ ناهێنه بكارئینان.
