پێشه‌وا هه‌ورامانی په‌یڤدارێ حكومه‌تا هه‌رێما كوردستانێ په‌یامه‌ك به‌لاڤكر:
ده‌قێ پەیاما په‌یڤدارێ حكومەتا هەرێما كوردستانێ:
ئه‌ڤرۆ دوشەمبی 22ی 1 ی 2024 ێ” په‌یڤدارێ وەزارەتا دەرڤه یا كۆمارا ئیسلامییا ئیرانێ د چاڤپێكەفتنه‌كێ دا ل گەل ڕۆژنامەڤانان جاره‌كا دی به‌هانه بۆ هێرشا مووشەكی یا حه‌فتییا بوری بۆ سەر هەولێرێ ئینان و گۆتییه” بنگه‌هێ مۆسادێ یێ ئیسرائیلیان ل هەولێرێ ب موشەكێن (نقطه زن و كودك زن) یێن خۆ كرییە ئارمانج و ئه‌و هێرشە ل دژی سەروەرییا عێراقێ و هەرێما كوردستانێ نەبوویە.
جهێ سەرسوڕمانێیه كو زێده‌باری هندێ شاندێ حكومەتا عێراقێ و جڤاتا نوونەرێن عێراقی و هژمارەكا زۆرا میدیایان و ڕێكخراوێن جڤاكێ مەدەنی سەره‌دانا مالا شەهید پێشڕەوی كرینە و هەموو لایەك شاهدێن هندێنه كو هێرشا مووشەكی یا ئیرانێ تاوانه‌ك بوویە ل بەرامبەر خەلكێ مەدەنی و ژن و زارۆیان هاتییه ئەنجام دان” بەلێ هێشتا بەرپرسێن ئیرانی بزاڤا بانگەشێن بێ بنەما دكەن و شانازییێ ژی ب وێ تاوانێ دكەن كو ل دژی وه‌لاتییێن بێتاوان یێن كوردستانێ ئەنجام دایە.
فەرموودا پیرۆز (أَخَذَتْهُ العزة بالإثم) ڕێكێ ل وێ شانازیكرنێ دگریت یاكو بەرپرسێن ئیرانێ ڕۆژانە بێی كو گوهدارییا ڕایا گشتییا عێراقێ و ئیرانێ و ده‌ڤه‌رێ و جیهانێ دوپاتیێ ل گۆتنێن وانێن نه‌راست دكەن.
ئەوا سوپایێ پاسدارێن كۆمارا ئیسلامییا ئیرانێ ب موشەكێن (نقطه زن و كودك زن – زارۆك كوژ)ان كری، تاوانه‌كا مه‌زنه ل دژی وه‌لاتییێن ئاسایی یێن هەرێما كوردستانێ و كوشتن و برینداركرنا ژن و زارۆیان بوو” هەروەسا ئەو كریارە بنپێكرنا ئاشكرا یا سەروەرییا عێراقێ و هەرێما كوردستانێ و بنەماییێن جیرانییێ و یاسایێن نێڤدەولەتی و ڕێككەفتنان بوو. ئەڤ تاوانە ب چ بانگەشەیێن نه‌ڕاست و سه‌ختەكرنا نووچه‌یان و وێنەكێ دروستکری ناهێته ڤه‌شارتن و ڕایا گشتییا ئیرانێ و عێراقێ و ده‌ڤه‌رێ ناهێنه سه‌ردابرن.
نوكه پرسیار و بۆچوونێن سەرەكی یێن میدیایان و ڕایا گشتییا جیهانی و ده‌ڤه‌رێ ئەوە، موشەك و (نقطه زن) ێن كۆمارا ئیسلامییا ئیرانێ دشێن بگەهنە گه‌له‌ك جهان و وه‌لاتێن دیتر كو ئیران وان ب دوژمنێ خۆ دزانیت، بەلێ بۆچی ب موشەكێن (نقطه زن) یێن خۆ ب تنێ خەلكێ بێتاوان و بێ پەنایێ هەرێمێ دكەنە ئارمانج؟ نه‌وێرن موشەكان بگرنە ئەوان وه‌لاتێن هێز و موشەك و چەكێن پێشكەفتی هەیین و ب تنێ بۆ خەلكێ بێ چەك و بێتاوانێن كوردستانێ د ئازانه.
