پەیڤدارێ كومەلا پیشەسازییا پەتڕۆلا كوردستانێ دیاركر، بڕیارە حەفتییا بهێت بەرپرسەكێ بلند یێ وەزارەتا دەرەڤە یا ئەمریكا لدور بابەتێ پەتڕۆل و بەشە بوودجەیا هەرێمێ، سەرەدانا عیراقێ بكەت.
مایلز كاگینز، پەیڤدارێ كومەلا پیشەسازییا پەتڕۆلا كوردستانێ ( ئەپیكۆر ) ڕاگەهاند، سەرەدانا سەرۆكوەزیرێن هەرێمێ بۆ ئەمریكا دێ پەیوەندییێن دناڤبەرا هەردوولا دا موكمتر كەت و دهەمان دەم دا كۆمبوونێن وی ل گەل بەرپرسێن بلند یێن ئەمریكا دێ كارتێكرنێن سیاسی و ئەمنی و ئابووری ل سەر پێشكەفتنێن هەرێما كوردستانێ و عیراقێ ژی هەبن.
دیار ژی كر، بەری سەرەدانا خۆ بۆ ئه‌مریكا، سه‌رۆكوه‌زیران مه‌سرور بارزانی پڕۆژه‌یه‌ك ب كۆنگرێسی دایه ژبۆ وێ یەكێ كێشەیێن دناڤبەرا هەرێما كوردستانێ و بەغدا دا چارەسەربكەت، ب تایبەت ئەوێن پەیوەندی ب بوودجە و پەتڕۆلێ ڤە هەی.
ئاشكەرا ژی كر، سه‌رۆكوه‌زیران مه‌سرور بارزانی پرسا هنارتنا پەتڕۆلا هەرێمێ ل گەل مەزنە بەرپرسێن ئەمریكا بەحسكریە، د ڤی چارچووڤەی ژی دا حەفتییا بهێت جێگرێ هاریكارێ وەزیرێ دەرڤە یێ ئەمریكا دێ سەرەدانا عیراقێ كەت و پەیاما ئەمریكا بۆ هنارتنا پەتڕۆلا هەرێمێ و چارەسەركرنا كێشه‌یێن بوودجێ كو زیانێن مەزن ب خه‌لكێ هه‌رێمێ گەهاندینە، گەهینیتە حكومەتا عیراقێ.
