لەتیف رەشید، سەرۆککۆمارێ عیراقێ لدویڤ دەستووری چەندین دەستهەلات هەنە، لێ سەرەڕای وان هەمی دەستهەلاتان چ دلگرانی و نەڕازیبوون بەرامبەر بڕیارێن دادگەها فیدڕال دەرنەبڕینە.
سەرۆککۆمارێ عیراقێ، بلندترین پۆستێ ئیدارییە د پەیكەربەندێ حكومی یێ وەلاتی دا كو ژلایێ جڤاتا نوینەرێن عیراقێ ڤە دهێتە هەلبژارتن و ماوێ هەر خۆلەكێ چار سالن و هەر كەسەك دشێت بۆ دوو خۆلان خۆ بەربژاربكەت.
د ماددەیێ 67 یێ دەستوورێ عیراقێ دا هاتییە، ” سەرۆکێ دەولەتێ و هێمایێ یەکگرتووییا نشتیمانی یە و نوینەرایەتییا سەروەرییا وەلاتی دکەت. پابەندبوون ب دەستووری، پاراستنا سەربەخۆییێ، سەروەری، یەکگرتوویی و سلامەتی و ئێك پارچەییا خاکێ عیراقێ لدویڤ حوكمێن دەستووری زامن دکەت. “
لدویڤ ماددێ 73 یێ دەستوورێ عیراقێ، دەستهەلاتێن سەرۆککۆمارێ عیراقێ پێكدهێن ژ:
ئێك: دەرکرنا لێخۆشبوونا تایبەت ب پێشنیازا سەرۆکوەزیرێن عیراقێ، ژبلی وان یێن ب ئەنجامدانا تاوانێن تیرۆر و گەندەلییا دارایی هاتینە حوکمكرن.
دوو: پەسندکرنا پەیماننامە و ڕێککەفتنێن ناڤدەولەتی، پشتی پەسندکرنێ ژلایێ جڤاتا نوینەران ڤە.
سێیەم: پەسەندکرن و دەرکرنا وان یاسایێن ژ جڤاتا نوینەران هاتینە تێپەڕاندن.
چوار: داخوازكرن بۆ بڕێڤەچوونا ڕوینشتنا جڤاتا نوینەرێن هەلبژارتی د دەمەكی دا كو 15 ڕۆژ ب سەر پەسەندكرنا ئەنجامێن هەلبژارتنان دەربازنەبن.
پێنج: پێدانا مەدالیان ل سەر پێشنیازا سەرۆکوەزیران لدویڤ یاسایێ.
شەش: قەبوویلکرنا بالیۆزان.
حەفت: دەرکرنا مەرسوومێن کۆماری.
هەشت: پەسەندکرنا حوکمێ سێدارەدانێ کو دادگەهێن تایبەت دەردکەن.
نەهـ: جێبەجێکرنا ئەرکێ فەرماندێ بلند یێ هێزێن چەکدار بۆ تەشریف و ئاهەنگگێڕانێ.
دەهـ : جێبەجێکرنا هەر دەستهەلاتەکا سەرۆکایەتییێ کو د دەستووری دا هاتبیت.
