ئاژانسا خانی:
عارف روشدی” شیره‌تكارێ مەکتەبا سیاسییا پارتی دیموکراتی کوردستان دیار كر: حكومه‌تا نوكه یا عیراقێ ژ لایێ یاساییڤە درێژە پێدەرا حوکومرانییێن دیتر یێن عێراقێیە و ئەوا وان کری ل دژی ئەوی باژێری دڤێت بچنە ل ژێر بەرپرسیارەتییێ و بهێن ئاریشێن هەلەبجە چارەسەر بکەن، بەلێ مخابنی هەلگرێن وێ هزرا كو هەلەبجە کیمیاباران کری، بەردەوام د حوکومرانییا عێراقێدا هەنە” دیسان بێده‌نگییا سه‌رۆك كۆمارێ عیراقێ مالوێرانییه” ئه‌ز دبێژم ژی خۆزی مه چ به‌رپرس ل عیراقێ نه‌بان” ب تنێ یێن پارتی دیموكراتی كوردستان نه‌بن” ئه‌ڤێن دیتر یێن بووینه ئه‌ژده‌ها و یێن به‌ربووینه گیانێ هه‌رێما كوردستانێ” هه‌روه‌سا سه‌رۆك كۆمارێ عیراقێ” د مادێ 67 یێ ده‌ستووری دا” ئه‌و ده‌ستهه‌لات هه‌یه” بێژیته دادگه‌ها بلندا فیدرالی راوه‌سته” به‌لێ مخابنی ده‌ستهه‌لاتێن خۆ بكار نائینیت” له‌وما هه‌كه وی رێز ل وی پۆستی گرتبا” پێدڤی بوو وی ئه‌و كارێن دادگه‌ها فیدرالی دكه‌ت قه‌بوولنه‌كربان” یان ژی ده‌ست ژ وی پۆستی به‌ردابا و عیراق تووشی ئاریشه‌كا سیاسی كربا.
ناڤهاتی زێده‌تر بۆ ئاژانسا خانی گۆت: هه‌رده‌م ئه‌م دبێژین” مه ئاریشا عەقلییەتێ ل گەل عێراقێ هەیە، چونکی ئەو هەموو ستەما وان كری وان لبه‌ره ستەمه‌كا دیتر ژی ل مه بکەن، ئەگەر حکومەتا سەدامی هەلەبجە و جهێن دیتر یێن کوردستانێ کیمیاباران کربن، نوكه ئه‌و دهێن هەموو گەلێ کوردستانێ کیمیاباران دکەن”، ئه‌رێ بڕینا بودجەیێ هەرێما کوردستانێ و مووچەیێ فه‌رمانبه‌ران نه کیمیابارانکرنە؟ هه‌روه‌سا چ جاران ل وێ هزرێ نه‌بن چ حکومەتێن عێراقێ ئەوێ تاوانێ ب تاوان بزانن و ئەگەر ب ده‌ست وان ڤه بهێت دێ گه‌له‌ك ژ سەردەمێ سەدامی خرابتر رەفتارێ ل گەل مه کەن.
عارف روشدی ئه‌و ژی ئاشكرا كر: ئەڤه چەند سالن حکومەتا هەرێما کوردستانێ بڕیارا پارێزگه‌هبوونێ بۆ هەلەبجە دەرکرییە، ڤێ چه‌ندێ پێدڤی ب رازیبوونا پەرلەمانێ عێراقێ و بەغدا هه‌یە” بەلێ هه‌تا نوكه وان ئه‌و بریاره نه‌دایه و هه‌كا وان بڤێت پیچه‌كێ روویێن خۆ سپی بکەن” دڤێت زوو ئه‌و بڕیارا پارێزگه‌هبوونا هەلەبجە پەسەند بکە” هه‌روه‌سا هەموو بڕیارێن وان د سیاسی توندرەون، ئەوان کورد نه‌ڤێن، دخوازم ژی خه‌لك ئه‌وێ راستییێ بزانن” كو ئه‌وا نوكه ئه‌و دكه‌ن” نان برین نینە، به‌لكی ئەوان کورد نه‌ڤێن، هەر چەنده ئەوان زمان و ئاخا مه ژی یا داگیر کری.
ناڤهاتی ئه‌و چه‌ند ژی دیار كر: عه‌ره‌بان دیتنه‌كا خراب ل هه‌مبه‌ری كوردستانێ هه‌یه و هه‌كه بۆ وان بچیته سه‌ر ب رێیا دادگه‌ها فیدرالی وان لبه‌ره قه‌وارێ هه‌رێما كوردستانێ ژی نه‌مینیت” ئه‌ڤه مه‌ره‌ما وانه” چونكی ئه‌وا ئه‌و دكه‌ن به‌رۆڤاژی ده‌ستوورێ عێراقێیه” دیسان ئه‌و كارێن دادگه‌ها بلندا فیدرالی ل دژی هه‌رێما كوردستانێ دكه‌ت” نه كارێ وێ یه و نه د ده‌ستهه‌لاتا وێ دایه” به‌لێ ئاراسته‌یێن سیاسی وێ دادگه‌هێ ب كاردئینن” داكو زیان بگه‌هیته هه‌رێما كوردستانێ ژ هه‌موو ئالییان ڤه.
هێشتا دبێژیت: چ جاران عه‌ره‌بان حه‌ز ژكوردان نه‌كرییه و عه‌ره‌بان كورد نه‌ڤێن” دیسان ئه‌و گۆتنا ئه‌م دبێژین” كو كورد و عه‌ره‌ب برانه” گۆتنه‌كا نه یا راسته” عه‌ره‌ب ب هه‌موو ره‌نگێن خۆڤه” د دیندار بن” علمانی بن” چه‌پ بن یان راست بن” وان ئێك هزرا هه‌یی” كو ئه‌و ژی تو نه‌بی” یان ژی هه‌كه تو هه‌بی” وه‌كو خزمه‌تكاره‌كێ لبه‌ر ده‌ستێ وان بی” ئه‌ڤ حكومه‌تا نوكه ژی درێژه‌پێدانا هه‌موو حوكومرانییێن عێراقێیه” هه‌كه ژلایێ یاسایی ڤه مرۆڤ به‌رێ خۆ بده‌تێ” ئه‌ڤ حكومه‌تا نوكه میراتخۆرێ حكومه‌تا ل سه‌ر ده‌مێ سه‌دامێ دكتاتۆره.
