<h3 style="text-align: justify;"><span style="font-size: 18pt;">وه‌زاره‌تا كۆچ و كۆچبه‌رێن عیراقێ ڕاگه‌هاند، ئه‌و دڕژدن ل 30ى ته‌مموزا ئه‌ڤساله هه‌موو كه‌مپێن هه‌رێما كوردستانێ بهێنه گرتن، ڕێڤه‌به‌رییا كۆچ و كۆچبه‌رێن دهۆكێ ژى دیاركر، ئه‌و بۆ هه‌ر هه‌ماهه‌نگییه‌كێ دبه‌رهه‌ڤن.</span></h3> <h3 style="text-align: justify;"><span style="font-size: 18pt;">عه‌لى عه‌باس په‌یڤدارێ وه‌زاره‌تا كۆچ و كۆچبه‌رێن عیراقێ و به‌رپرسێ لقان ل وه‌زاره‌تێ ئاشكراكر، ئه‌و پێشبینى دكه‌ن ل هه‌یڤا گۆلانێ و پشتى تمامبوونا تاقیكرنێن قوتابییان، ژماره‌یه‌كا مه‌زن یا ئاواره‌یان ڤه‌گه‌رنه جهێ خوه، محه‌مه‌د شیاع سوودانى سه‌رۆكوه‌زیرێن عیراقێ پشته‌ڤانییێ ل ڤه‌گه‌ریانا ئاواره‌یان دكه‌ت.</span></h3> <h3 style="text-align: justify;"><span style="font-size: 18pt;">ژلایێ خۆڤه ڕێڤه‌به‌رێ ڕێڤه‌به‌رییا كۆچ و كۆچبه‌ران و به‌رسڤدانا قه‌یرانان ل دهۆكێ پیرده‌یان پیر جه‌عفه‌ر بۆ ئاژانسا خانى ئاشكراكر، سوبه‌هى شانده‌كێ وه‌زاره‌تا كۆچ و كۆچبه‌رێن عیراقێ دێ سه‌ره‌دانا هه‌ولێرێ كه‌ت و كۆمبوونێ دگه‌ل لایه‌نێن په‌یوه‌ندیدار كه‌ت و گوت: ئه‌و بۆ هه‌ر هه‌ماهه‌نگییه‌كێ ل دۆر ڤه‌گه‌ریانا ئاواره‌یان و گرتنا كه‌مپان دبه‌رهه‌ڤن، ئه‌ڤ چه‌نده دێ بارێ هه‌رێمێ سڤك كه‌ت، ژبه‌ركو دابینكرنا پێدڤییێن ساخله‌مى، په‌روه‌ردێ، ئاڤ و كاره‌بێ و خزمه‌تگوزارییان ب گرانى ل سه‌ر حكومه‌تا هه‌رێما كوردستانێ دڕاوه‌ستیت.</span></h3> <h3 style="text-align: justify;"><span style="font-size: 18pt;">ل دووڤ دووماهى ئامارێن وه‌زاره‌تا كۆچ و كۆچبه‌رێن عیراقێ، 24 كه‌مپ ل هه‌رێما كوردستانێ هه‌نه و 15 ژ وان ل پارێزگه‌ها دهۆكێنه.</span></h3>
