ئاژانسا خانی:
بسپۆره‌كێ یاسایی و دەستووری دبێژیت، دەستوورێ عێراقێ دەستهه‌لات داینه سەرۆککۆماری پارێزگارییێ ل دەستوورێ عێراقێ بکه‌ت و هه‌روه‌سا لدووڤ دەستوورێ عیراقێ سه‌رۆككۆمار دشێت رێگرییێ ل بڕیارێن دادگه‌ها فیدرالی بکه‌ت، چونکی بریارێن وێ دادگه‌هێ بووینه ئه‌گه‌رێ تێکدانا ئارامییێ” سه‌رۆككۆمار پارێزه‌رێ ده‌ستوورێ عێراقێیه” به‌لێ ب مخابنی ڤه” كوردان ئه‌ڤ پۆسته یێ لاوازكری و هه‌تا نوكه نه‌هاتییه كاراكرن ل عێراقێ” چونكی سه‌رۆككۆمار سه‌روه‌رێ هه‌موو ده‌ستهه‌لاتێیه” به‌لێ هه‌تا نوكه وی به‌رگری ژ ده‌ستووری نه‌كرییه و دیسان به‌رگری ژ هه‌رێما كوردستانێ ژی نه‌كرییه” دیسان نوكه لایه‌نێن شیعی یێن ده‌ستووری بنپێ دكه‌ن” هه‌ر چه‌نده سه‌رۆككۆمارێن عیراقێ یێن به‌ری ڤی ژی” كو ئه‌ڤێ نوكه یێن به‌ری ڤی ژی سه‌ر ب ئێكه‌تییێ ڤه‌بوون ئه‌ڤ كاره نه‌كرییه” هه‌ر ژ پشتی سالا 2003 ێ هه‌تا نوكه” یا دیاره ئه‌ڤێ نوكه ژی وێ وێره‌كییێ ناده‌ته خۆ” كو بریارێن دادگه‌ها فیدرالی رابگریت.
د. وەعدی مزووری، زێده‌تر بۆ ئاژانسا خانی دبێژیت: لدووڤ مادێ ٦٧ یێ دەستووری یێ عێراقێ” سەرۆککۆمار دشێت رێگرییێ ل بڕیارێن دادگه‌ها بلندا فیدرالی بکه‌ت” چونكی سەرۆککۆمار پارێزەرێ دەستوورییە و ھەر ده‌مێ دادگه‌ها بلند خۆ ژ دەستووری لابده‌ت” سەرۆککۆماری دەستهه‌لات ھەیە بریارێن وێ دادگه‌هێ راوه‌ستینیت و ڕێگرییێ لێ بکه‌ت ژ دەرکرن و بجهئینانا ھەر بڕیاره‌كێ.
ناڤهاتی گۆت ژی: سەرۆککۆمار پارێزەرێ دەستوورێ عێراقێیە و پێدڤییە ئەرکێ خۆ بجهبینیت بۆ پاراستنا بەندێن دەستووری، به‌لێ ب مخابنی ڤه” ھێشتا سەرۆککۆمار نەشییایە دەستهه‌لاتێن خۆ بکاربینیت بۆ پاراستنا دەستووری” هه‌تا نوكه ئه‌گه‌ر د دیار نینن” كانێ بۆچی سەرۆککۆمارێ عێراقێ یێ بێدەنگە ل بەرامبەر بڕیارێن دادگه‌ها فیدرالی ل دژی ھەرێما کوردستانێ.
دادگه‌ها بلندا فیدرالییا عیراقێ یا هاتییه چێكرن بۆ لێدانا قه‌وارێ هه‌رێما كوردستانێ” پشتی یاسایێ 25 ل سالا 2021 ێ ده‌رچوویی” كو ئه‌و یاسایێ وێ دادگه‌هێ هاتییه هه‌مواركرن” كو ئه‌و ده‌سته‌یا نوو یا وێ دادگه‌هه ب تنێ ل سه‌ر هه‌رێما كوردستانێ كار دكه‌ت” كو هه‌تا نوكه چه‌ندین بریار ل دژی هه‌رێما كوردستانێ ده‌ركرینه” وه‌كو یاسایا نه‌فت و غازێ و یاسایا گرێدایی هه‌لبژارتنێن په‌رله‌مانێ كوردستانێ” دیسان ئه‌ڤ دادگه‌هه نه‌یا سه‌ربه‌خۆیه” لدووڤ ده‌ستووری نه‌هاتییه دانان و تائیفه‌گه‌ری گه‌له‌ك یا تێدا هه‌یی پێنج دادوه‌رێن شیعی دناڤ دا هه‌نه” دو كورد و دو عه‌ره‌بێن سوننی و بریار ب پرانییا ده‌نگان ده‌ردكه‌ڤن” له‌وما هه‌ر بریاره‌كا شیعه بده‌ن” ئه‌و بریاره ل وێ دادگه‌هێ دێ وه‌كو وان بیت” چونكی ئه‌وان پێنج دادوه‌ر هه‌نه و پترینن.
ناڤهاتی گۆت ژی: یا دیاره كو دادگه‌ها فیدرالییا عیراقێ نه یا سه‌ربه‌خۆیه و ده‌ستێوه‌ردانێن ناڤخۆیی و ژ ده‌رڤه ژی تێدا هه‌نه” یا بوویه ئامرازه‌ك بۆ هنده‌ك ئالییێن سیاسی یێن عیراقی و وه‌لاتێن ده‌وروبه‌ر” بۆ لێدان و ژناڤبرنا قه‌وارێ هه‌رێما كوردستانێ” هه‌روه‌سا ئاریشا مه كوردان ئه‌وه” ئه‌م ئێك ده‌نگ و ئێك هه‌لویست نینین و ناڤمالییا كوردی نه‌یا رێكخستییه” له‌وما دادگه‌ها بلندا فیدرالی ژی ڤان بریاران ل دژی هه‌رێما كوردستانێ دده‌ت” بۆ راگرتنا وان بریاران ژی مه دو رێك هه‌نه” ئه‌و ژی ئه‌م كورد ببینه ئێك بریار و ئێك هه‌لویست ل هه‌مبه‌ری حكومه‌تا عێراقێ و دیسان ئه‌و دادوه‌رێ كورد ئه‌وێ مایی ژی خۆ ژ دادگه‌ها فیدرالی ڤه‌كیشیت و بزاڤ بهێنه كرن” كو ئه‌و دادوه‌رێن نوكه بهێنه گوهۆرین و هنده‌ك دداوه‌رێن دی ل دادگه‌ها فیدرالی بهێنه دانان.
