عه‌لی دۆله‌مه‌ری: فرەنسا پشته‌ڤانییێ ل ھەرێما كوردستانێ دكه‌ت

ئاژانسا خانی:

نوونەرێ حکومەتا ھەرێما کوردستانێ ل فرنسا دیار كر: فرەنسا پشته‌ڤانییێ ل حکومەتا ھەرێما کوردستانێ دكه‌ت و داخواز دكه‌ت ھەرێم و بەغدا لدووڤ ده‌ستووری ئاریشێن خۆ چارەسەر بکەن.

عەلی دۆلەمەری، بۆ ئاژانسا خانی گۆت: فرەنسا ئێکە ژ وان وه‌لاتێن هه‌رده‌م پشته‌ڤانییێ ل ھەرێما کوردستانێ دكه‌ت، سەره‌دانا ڤێ جارێ یا شاندێ حکومەتا ھەرێما کوردستانێ یا سه‌ركه‌فتی بوو، چونکی ھەرێما کوردستانێ بۆ فره‌نسا یا گرنگە و وان پشته‌ڤانییا خۆ ژی بۆ حکومەتا ھەرێما کوردستانێ ته‌كه‌ز كرییه‌.

ناڤهاتی گۆت ژی: فرەنسا ته‌كه‌زی ل سه‌ر هندێ كرییه‌ كو پێدڤییە عێراق ئاریشێن خۆ د چارچوڤێ دەستووری دا ل گەل ھەرێما کوردستانێ چارەسەر بکه‌ت و مافێن ھەرێما کوردستانێ بده‌ت، چونکی ئه‌و د دلگرانن ژ هندێ كو ئەو ئاریشە د بەردەوام بن، له‌وما ئارامییا عێراقێ و ھەرێما کوردستانێ یا گرێدایه‌ ب چارەسەرکرنا ئاریشێن دناڤبه‌را ھەرێما کوردستانێ و عێراقێ.

ئه‌و ژی گۆت: د دیرۆكێ دا جارا ئێكێیه‌ ل سیناتا فرەنسا بیره‌وه‌رییا نەورۆزێ ب پشكدارییا شاندێ حکومەتا ھەرێما کوردستانێ دهێته‌ كرن، ئەڤه‌ گاڤه‌كا گرنگە بۆ ھەرێما کوردستانێ، وه‌لاتێ فرەنسا گه‌له‌ك گرنگییێ ب ھەرێما کوردستانێ دده‌ت” هه‌روه‌سا فره‌نسا ته‌كه‌زێ ل سه‌ر هندێ دكه‌ت” پێدڤییە ئاریشێن دناڤبه‌را ھەرێم و بەغدا بهێنه‌ چارەسەر كرن، ئه‌و کار دکەن ئاریشێن وان دناڤبه‌را ھەردو ئالییان ب دانوستاندنێ و لدووڤ دەستوورێ عێراقێ بهێنه‌ چارەسەرکرن.