فرانس پرێس: هنده‌ك لایەنێن شیعی بزاڤێ دكه‌ن قەوارێ هەرێما کوردستانێ لاواز بكه‌ن

 ئاژانسا فرانس پرێس” یا فرەنسی ڕاپۆرته‌ك دەربارەیی ئاریشه‌ و ناکۆکییێن هەولێر و بەغدا به‌لاڤكرییه‌ و گۆتییه‌” ل ژێر فشارێن هنده‌ك لایەنێن شیعی، حکومەتا عێراقێ نەشییا ئەوێ ڕێککەفتنا ل سەر نەفت و بودجەیی ل گەل حکومەتا هەرێما کوردستانێ کری بجهـ بینیت” ژبه‌ر کاریگەرییێن ئەوان لایەنان دادگه‌ها فیدرالی چەندێن بڕیار ل دژی قەوارێ هەرێما کوردستانێ دان.

ل هه‌یڤا شواتێ، دادگه‌ها بلندا فیدرالی ل بەغدا، فەرمان دا حکومەتا فیدرالی، ل جهێ هندێ كو ب رێیا ئیدارا هەرێمێ مووچە بهێته‌ دابەش كرن، مووچێ کەرتێ گشتی ل کوردستانێ، ب شێوێ ڕێککەفتن، ڕاستەوخۆ بهێته‌ خەرج كرن.

ئه‌و ژی گۆتییه‌” ل ئادارا سالا 2023 ێ، حکومەتا عێراقا فیدرالی ل دادگه‌ها پاریس سکاڵایەک ل سەر نەفتا هەرێما کوردستانێ ل دژی تورکیا بر و ب بڕیارا وێ دادگه‌هێ هنارتنا نەفتا هەرێما کوردستانێ بۆ تورکیا و بەندەرێ جەیهان هاته‌ ڕاگرتن.

پاشی هەولێر ل گەل بەغدا ڕێککەفت کو نەفتا هەرێما کوردستانێ ڕادەستی حکومەتا عێراقێ بکه‌ت و د بەرامبەردا حکومەتا عێراقێ %12.6 ێ” د بودجەیێ گشتییێ بده‌ته‌ هەرێما کوردستانێ، بەلێ ژ لایێ عێراقێڤە ئه‌و ڕێکكەفتننامە نه‌هاته‌ بجهئینان.

پاشی حکومەتا عێراقێ داخوازا هه‌موو داهاتێن نه‌ نەفتی یێن هەرێما کوردستانێ ژی کر.

د درێژاهییا وان دژایەتییان دا ل بەرامبەر هەرێما کوردستانێ، ڕێیا دادگه‌ها فیدرالی ژی گرته‌بەر و چەند بڕیار ل دژی قەوارێ هەرێما کوردستانێ دەرکرن، ژ وان ژی کێمکرنا ژمارا کورسییێن پەرلەمانێ کوردستانێ ژ 111 کورسییان بۆ 100 کورسییان، کو کورسییێن کۆتایێن پێکهاتێن نەتەوەیی وەکو تورکمان، کلدان، ئاشووری و ئەرمەنان.