سه‌رۆكێ هه‌رێما كوردستانێ په‌یامه‌كا پیرۆزباهییێ ب هه‌لكه‌ڤتا 1ى گۆلانێ ڕۆژا جیهانییا كرێكاران به‌لاڤكر و دیاركر، دڤێت لایه‌نێن په‌یوه‌ندیدار چاڤدێرییا خێزانێن وان كرێكاران بكه‌ن یێن دكاریدا ژیانا خوه ژ ده‌ستداى.
نێچیرڤان بارزانى سه‌رۆكێ هه‌رێما كوردستانێ دپه‌یاما خوه‌دا ب هه‌لكه‌ڤتا ڕۆژا جیهانییا كرێكاران، گه‌رمترین پیرۆزباهى ل هه‌موو كرێكارێن كوردستانێ، عیراقێ و جیهانێ كرن و گوت: هیڤییا ئارامى و خوشگوزه‌رانی و سه‌رفه‌رازییێ بۆ وان دخوازیت.
سه‌رۆكێ هه‌رێما كوردستانێ ئاماژه ب هندێ ژى دا، ب ڕێز و پێزانینڤه ته‌ماشه‌ى ئه‌رك و زه‌حمه‌تا كرێكاران و ڕۆلێ وان یێ كارى د پرۆسه‌یا ئاڤه‌دانكرنێ و بنیات دانانێدا دكه‌ت، دووپاتییێ ل به‌رده‌وامبوونا پشته‌ڤانیكرنێ ل هه‌موو ماف و داخوزییێن وان یێن ڕه‌وا دكه‌ن، كو زه‌مینه و ژینگه‌هه‌كا گونجاى یا كاركرنێ و ژیانه‌كا باشتر بۆ ته‌خا زه‌حمه‌تكێشێن كرێكاران و خێزانێن وان به‌رده‌ست بكه‌ت.
هه‌ر دڤێ هه‌لكه‌ڤتێدا نێچیرڤان بارزانى سه‌ندیكا و ڕێكخراوێن كرێكاران پالدده‌ت، كارێ باشتر و بزاڤێن زێده‌تر بۆ دابینكرن و پاراستنا مافێن كرێكاران و ڕه‌خساندنا یه‌كسانییێ د ده‌رفه‌تێن كاریدا بكه‌ن، هه‌روه‌سا دڤێت لایه‌نێن په‌یوه‌ندیدار چاڤدێرییا خێزانێن وان كرێكاران بكه‌ن یێن دكاریدا ژیانا خوه ژ ده‌ستداى و گرنگییێ ب باشتركرنا ڕه‌وشا ژیان و گوزه‌رانییا وان بده‌ن.
